Manifestación contra o "desmantelamento" dos hospitais comarcais como o de Verín

Ademais da protesta prevista para este martes 17 de decembro fronte ao Parlamento, SOS Sanidade convoca outra para febreiro. Tamén di que a propia Xunta boicotea as comisións que debían fixar solucións para Atención Primaria.

A plataforma SOS Sanidade Pública acordou fixar para o próximo 9 de febreiro a "gran manifestación" que celebrarán en Santiago de Compostela para protestar contra o "desmantelamento" dos hospitais comarcais, a "deterioración da atención primaria" e a "precariedade laboral" do persoal sanitario. A protesta será a partir das 12,00 horas con saída desde a Alameda.

Unha nena nunha pasada mobilización polo paritorio do hospital de Verín

Para perfilar esta manifestación, SOS Sanidade Pública creará unha "comisión de traballo" plural e propoñerá ás plataformas das áreas onde hai hospitais comarcais que o día 28 de decembro organicen accións de protesta "contra o desmantelamento" destes centros.

CRÍTICAS Á SOLUCIÓN DA XUNTA PARA ATENCIÓN PRIMARIA

Segundo aseguraron os integrantes da plataforma, os participantes no Consello Técnico de Atención Primaria informaron "da actitude boicoteadora da Administración sanitaria galega, que en seis meses foi incapaz de pechar propostas de mellora".

"As escasas Comisións Sectoriais que terminaron o proceso de debate limitáronse a propoñer a Carteira de Servizos e o Mapa de Competencias de cada unha das categorías presentes nos centros de saúde, sen incluír outras categorías profesionais que deben estar presentes nos centros de saúde, así como as meidas de mellora de cada categoría, nin recoller as achegas e propostas dos colectivos sindicais e profesionais", criticaron.

A maiores, SOS Sanidade Pública mostrou o seu apoio á "mobilización social e profesional" tras o anuncio de peche do paritorio do Hospital de Verín e das urxencias pediátricas, e participarán activamente na protesta por este motivo que se celebrará o 17 de decembro ante o Parlamento de Galicia, en Santiago.