Os folguistas poden deixar de formar novos pediatras se non ven melloras reais en breve

A segunda xornada de folga en Atención Primaria volve suscitar cifras moi dispares de seguimentos segundo as publique a Xunta -que apela ao diálogo- ou os convocantes -que advirten de novas medidas como deixar de formar aos mozos, se non ven melloras antes de que acabe o ano

Os convocantes da folga de médicos e pediatras na Atención Primaria de Galicia este 27 e 28 de novembro --a segunda convocatoria autonómica tras o 19 de xuño e a terceira na área de Vigo deste ano-- dan de prazo a primeira quincena de decembro para ver medidas implantadas nas consultas, mentres que o Sergas ofrécelles diálogo a través dos grupos de traballo.

Médicos de Atención Primaria se manifesteraon onte na Coruña | En Marea

A XUNTA QUERE DIALOGAR 
En declaracións a Europa Press este xoves, o xerente do Sergas, Antonio Fernández-Campa, insistiu, tras as críticas pola ausencia de contactos por parte dos convocantes do paro, en que dialogan "con todo o mundo". "Se queren un diálogo connosco, non hai ningún problema", afirmou.

Con todo, enmarcou ese diálogo nos grupos de traballo para o desenvolvemento de medidas para mellorar a Atención Primaria en Galicia. "Non podemos obrigar a participar nos grupos de traballo", sinalou, para engadir que "se alguén se quere incorporar, non hai ningún problema".

Campa admitiu que "cando se abre un proceso de diálogo existen opinións distintas", polo que a través dos grupos de traballo tratan de alcanzar "obxectivos comúns". "Estamos abertos ao diálogo e á participación", sentenciou.

Fronte a iso, o portavoz da Asemblea de Áreas Sanitarias de Galicia, Alberto García, de Vigo, manifestou a Europa Press que "o día 4 (de decembro) presentan os grupos de traballo as súas conclusións".

Por iso, os convocantes da folga cren que "ten pouca lóxica" sumarse agora a eles, polo que optan por ver "como o Sergas é capaz de encardinar esas conclusións do grupo de expertos". Por iso, concédenlle a primeira quincena do próximo mes para comprobar que chega ás consultas.

NON FORMARÁN NOVOS PEDIATRAS SE NON HAI MELLORA
Como primeira medida, se non mellora a situación nos centros de saúde, Alberto García avanzou que na área de Vigo abandonarán a docencia de residentes de primeiro ano. Unha cuestión clave, pois os activistas estiman que ata a metade dos pediatras do SERGAS xubilaranse no próximos cinco anos e a administración cada vez ten máis problemas en captar pediatras interesados en cubrir baixas.

"Necesitamos recursos humanos; médicos traballando connosco", reivindican, para sinalar o "aumento das prazas estruturais" para que os centros de saúde "poidan autogestionar o seu centro cun mínimo de recursos" que, aseguran, agora "non teñen".

O SERGAS DI QUE CHEGARON MÁIS QUE IMPRESORAS
Ante estas críticas e despois de que os convocantes da folga asegurasen que nas consultas as únicas medidas que chegaron foi impresoras novas, o xerente do Sergas incidiu en que "verán ecógrafos, escáneres e moito equipamento electromagnético e mobiliario". "Está a comprarse e instalando", abundou.

Así mesmo, Campa incidiu nas medidas implementadas en materia de recursos humanos, con novas prazas de profesionais sanitarios para 2019 e 2020 que irán "aos centros que as necesiten". "Hai moitas medidas tomadas e outras no ámbito da xestión", subliñou para asegurar que "están a empezar a dar froitos".

En concreto, destacou que se traballa en "implantar un sistema para a sobredemanda" que se produce coas urxencias nos centros de Primaria. "Está a definirse un modelo de atención desa sobredemanda", avanzou, xa que este nivel asistencial "ten unha atención continuada".

SEGUIMENTO DO SEGUNDO DÍA DE FOLGA NOS CENTROS DE SAÚDE
En relación ao seguimento desta segunda xornada de folga desta semana na Primaria en Galicia, os convocantes destacaron que "se mantén" a porcentaxe xa que "o que sobe nunhas baixa noutras".

Neste sentido, por parte da Asemblea de Áreas Sanitarias de Galicia destacaron a Europa Press o 88% de apoio en Vigo, "cinco puntos máis que onte (mércores"; o 39% en Lugo, que sobe tamén, e o 62,5% en Ferrol, que cae lixeiramente. "A vontade do colectivo de médicos non cambia dunha xornada para outra", aseguraron.

Tamén o xerente do Sergas manifestou que os datos deste xoves "son similares a onte (mércores)" e subliñou que o respaldo a esta convocatoria de novembro supón "a metade" que a de xuño.

Segundo os datos facilitados pola Consellería de Sanidade, na quenda de mañá deste xoves foi secundada nos centros asistenciais de Primaria por un 15,1 por cento do total de persoal chamado á folga.

Por áreas sanitarias, apunta un 8,4% na área sanitaria da Coruña e Cee; un 18,1% na de Ferrol; 8,9% na de Santiago e Barbanza; o 5,2% na de Lugo, A Mariña e Monforte; 15,5% na de Ourense, Verín e O Barco; 22,6% en Pontevedra e O Salnés; e 32,5% na de Vigo.

Fernández-Campa valorou que o grao de cumprimento dos servizos mínimos durante a xornada de folga é do 100%. "Os profesionais están a cumprir estritamente os mínimos, prestando servizo aos cidadáns", concluíu.