​No Carballiño os exames prepáranse dentro dunha neveira

O grupo municipal 'Espazo Común' denuncia o estado da biblioteca pública, á que sinalan como un "foco de problema" e acusa o goberno local de incumprir as súas promesas para acondicionar o complexo.

Unha biblioteca

"Un ano máis, e xa son moitos, os cidadáns de O Carballiño que utilizan o servizo da Biblioteca Municipal vense maltratados polo deixamento dun goberno que só parece ter tempo para roteiros das tapas e fotos dos seus membros celebrando non se sabe moi ben que", denuncian desde Espazo Común.

E é que, segundo explican desde o grupo municipal, os usuarios da biblioteca, a maioría deles estudantes, vense obrigados a permanecer dentro das instalacións con roupa de abrigo. "Chaquetas e mesmo bufandas e luvas", advirten.

De novo a Biblioteca Municipal semella ou Polo norte. Xa está ben !! @ccarballino pic.twitter.com/SrmDWkizEQ

— Espazo Común (@espazo_comun) November 12, 2019

Todo isto causado pola ausencia de calefacción, unha das melloras prometidas "pero nunca executadas" polo goberno caballiñés. Na oposición do municipio ourensán poñen o foco sobre o titular da área de Cultura que "dedica o seu tempo para facer de palmeiro do secretario provincial do PSOE" no canto de acondicionar a biblioteca.