​Jácome apúntase para el a vitoria de 'Teruel Existe'

O alcalde ourensán agrega ao seu haber un triunfo ocorrido a máis de 700 quilómetros de distancia. Gonzalo Pérez Jácome aproveitou a entrada de 'Teruel Existe' no Congreso dos Deputados para poñer en valor a marca de 'Democracia Ourensana' ao considerar que a forza aragonesa logrou "aquilo" polo que naceu o seu partido. 

Jácome comparou a formación de Goberno co seu pacto con Baltar

"Quítome o chapeu ante Teruel Existe porque o noso partido (DO) naceu con esa idea, loitar contra a discriminación de Ourense", expresou Jácome, non sen antes manifestar que para el "é unha honra".

FORMAR GOBERNO...Á OURENSÁ?

Na mesma liña, para o rexedor auriense os resultados do 10N demostran "que a xente quere que se chegue a acordos" e rememorou o seu pacto co Partido Popular, aquel que lle asegurou a cadeira á fronte do goberno municipal e permitiu a continuidade da saga Baltar aos mandos da Deputación de Ourense. 

Por ese motivo, o alcalde ourensán salientou que os votos aos socialistas baixaron na cidade termal, mentres que os do PP soben. "Demóstrase que o pacto que nós fixemos e que dicían que era a perdición é todo o contrario",  comenta. "A xente vota para que se goberne e non para que se ocupe unha cadeira máis", asevera Jácome.

Doutra banda, o rexedor reclamou, ante os resultado no conxunto do Estado, "un cambio da Lei Electoral" para desconxelar a situación. "Non se pode estar abocado ás eleccións constantemente", concluíu.