Unha ambulancia cae ao río en Touro con catro pacientes para diálise no seu interior

Cinco persoas resultaron feridas nun accidente de tráfico rexistrado na mañá deste martes no termo municipal de Touro (A Coruña) ao caerse unha ambulancia ao río que levaba catro pacientes a diálise.

Os cinco ocupantes foron rescatados

O sinistro tivo lugar sobre as 7,15 horas deste martes no lugar de Bendaña, ao precipitarse ao río unha ambulancia de transporte programado con catro pacientes para diálise e o condutor, informaron a Europa Press fontes da Garda Civil.

As mesmas fontes confirmaron que o condutor da ambulancia, que sufriu unha saída de vía e precipitouse ao río, obtivo resultado negativo na proba de alcoholemia.

O 112, tras recibir o aviso do sinistro, mobilizou a Urxencias Sanitarias de Galicia-061, aos Bombeiros do Deza e de Arzúa, á Garda Civil de Tráfico e ás Agrupacións de Voluntarios de Protección Civil de Vila de Cruces e de Touro.

Ao lugar, Urxencias Sanitarias de Galicia-061 enviou dúas ambulancias asistenciais para atender a cinco pacientes, tres homes e dúas mulleres.

En concreto, foron trasladados ao Hospital Clínico de Santiago os homes J.M.B., de 77 anos, e G.B.P., de 74, así como as mulleres M.C.S., de 60 anos, e I.C.R., de 75. Por suparte foi levado á Clínica Souto Boo o home J.L.R., de 54 anos, informaron fontes sanitarias.