Pide probar un coche en Holanda e acaba detido conduciendolo por Sanxenxo

Os feitos sucederon a pasada fin de semana cando unha patrulla de seguridade cidadá do Posto Principal de Sanxenxo cruzouse cun turismo da marca Mercedes conducido por un veciño de Sanxenxo coñecido polos axentes "polo seu amplo historial delituoso", indicaron as mesmas fontes.

Ao solicitar a patrulla a titularidade do vehículo, os axentes comprobaron que as placas de matrícula correspondíanse con outro da mesma marca, pero distinto modelo, propiedade dun veciño de Noalla.

A investigación concluíu o pasado martes coa localización do Mercedes estacionado diante do domicilio que ten esta persoa en Portonovo.

Segundo as investigacións realizadas, púidose comprobar que esta persoa ten dobre nacionalidade, española e de Países Baixos. As mesmas fontes explicaron que "a principios de mes estivo nun concesionario de vehículos usados en Holanda onde se interesou pola compra dun Mercedes".

Segundo a información solicitada, o individuo pediu que lle permitisen facer un percorrido de proba co vehículo para concretar a compra e non o restituíu e regresou a España inmediatamente.

PLACAS CAMBIADAS

"Ao chegar a Sanxenxo, co obxecto de pasar máis desapercibido, cambioulle as placas de matrícula por outras españolas que se corresponden con outro turismo Mercedes pero de distinto modelo, propiedade dun veciño de Noalla", asegurou a Benemérita.

Esta persoa, que, aseguran as mesmas fontes, conta con "un amplo historial delituoso", a maior parte deles relacionados con estafas en hoteis e restaurantes (simpas), foi detido nesta ocasión como presunto autor dun delito de furto e outro de falsidade documental.

Foi posto ao dispor do xulgado de Instrución de garda de Cambados, que decretou a súa liberdade provisoria con cargos. Pola súa banda, o vehículo quedou depositado nas dependencias do cuartel da Garda Civil de Sanxenxo, pendente de resolución xudicial para ser recollido polo seu propietario.