Falta a cesión de "3 ou 4" veciños para as obras da estrada pola que piden axuda a Deus

Balseiro apunta que "a administración ten un instrumento para levar adiante as obras" como a expropiación para poder acometer os arranxos do camiño. 

O alcalde de Xermade (Lugo), o socialista Roberto García, asegurou este luns que son "poucos" os veciños, "entre 3 ó 4", os que faltan por ceder terreos para proceder ao arranxo da estrada que une Momán coas Pontes, a LU-P-2204, que é de titularidade provincial.

O mal estado desta estrada, estrecha e con fochancas, levou esta fin de semana ao párroco de Momán, Luís Rodríguez Patiño, a oficiar unha misa na zona para reclamar a "intervención divina" para reparala.

Roberto García, que tamén é deputado provincial, lembrou que "van feitos catro quilómetros e estaban adxudicados por parte da Deputación outros catro". "Falta a cesión (de terreos) duns poucos propietarios e por iso non se empezaron os traballos", explicou.

"A intención da Deputación é facelo (o arranxo polo que se comprometeron 500.000 euros), pero como o resto de veciños fixeron cesión dos seus terreos non se vai a expropiar agora a ninguén", sostivo.

Por iso, emprazou a eses "tres ou catro" veciños a que cedan eses leiras, no que "sería unha franxa estreita polos laterais da estrada" para ser acondicionada "con aglomerado e pintura", abundou.

En canto a que se estea presionando a eses veciños, segundo denunciou o PP dese Concello, o alcalde rexeitouno. "Non é razoable que un partido poña cambadelas para unha obra de futuro", concluíu.

EXPROPIACIÓN

Por parte de la Xunta, o delegado en Lugo, José Manuel Balseiro, que non quixo polemizar ao "non ser unha estrada" que dependa do Goberno galego, incidiu en que son "estrañas" as declaracións, con respecto a esa cesión de terreos, que tamén facía a portavoz socialista na Deputación, Pilar García Porto.

Balseiro apelou a que "os veciños poden ceder ou non ceder os terreos, pero a administración ten un instrumento para levar adiante as obras" e ese "instrumento" é a expropiación, apuntou o delegado do Goberno galego en Lugo.