Un incendio arrasa preto de 20 hectáreas e queda extinguido en nove horas

Un incendio forestal que se declarou este xoves no concello coruñés de Lousame, sobre as 16,30 horas, quedou extinguido ás 1,23 horas deste venres xa tras arrasar 19,6 hectáreas, 10 delas de monte arborizado e 9,6 de raso.

Segundo informa a Consellería do Medio Rural, que só dá conta dos lumes que superan ou roldan as 20 hectáreas, as chamas rexistráronse na parroquia de Tállara.

En apagalo chegaron a traballar, en total, segundo os datos do departamento autonómico, cinco axentes, 11 brigadas, cinco motobombas, dúas pas, sete helicópteros e un avión.