Outro desprendemento pon en alerta aos visitantes da praia das Catedrais

A praia das Catedrais, en Ribadeo, rexistrou un novo desprendemento este xoves, aínda que afortunadamente ningún visitante resultou ferido.

Desde Protección Civil apuntan que estas caídas de laxas son algo "habitual", sobre todo cando se producen cambios de temperaturas como os destes días e choivas.

De acordo con Protección Civil, o desprendemento "debeu de ser pola mañá", pero nunha cova e "a xente está avisada de que non pode andar polos cantís".

Nunha xornada festiva de bo tempo en plena ponte de agosto, a zona, con numerosos turistas, foi sinalizada e logo cuberta pola marea.

En marzo do ano pasado produciuse o accidente que acabou coa vida dunha moza á que caeu unha pedra na cabeza. Estes feitos motivaron un reforzo dos estudos sobre a seguridade do areal por parte das diferentes administracións.