Os xerentes do CHOP investigados por presuntamente "gastar de forma innecesaria" preto de 300.000 euros, denuncia CESM

|

O sindicato denuncia que "empresas externas realizarían o mesmo traballo que o gabinete" de prensa e que foron os xerentes os encargados de subcontratar a esas empresas, nas que se realizou un gasto próximo aos 300.000 euros. O Xulgado de Instrución número 2 de Pontevedra  investígao. 


Eoxi pontevedra


Fachada do CHOP


O Xulgado de Instrución número 2 de Pontevedra incoou dilixencias previas por mor da denuncia presentada en maio de 2018 polo sindicato médico CESM Galicia contra os xerentes da EOXI Pontevedra-O Salnés José Manuel González Álvarez e José Ramón Gómez Fernández, por un suposto delito de malversación de fondos, ao duplicar os servizos de comunicación do Complexo Hospitalario de Pontevedra (CHOP).


Segundo informou CESM nun comunicado, a autoridade xudicial considera que, "de ser acreditados, os feitos descritos na denuncia poderían constituír un delito de malversación ou prevaricación" polo que, engade o sindicato, "no caso de que o requirimento da entrega da documentación referente a estes procedementos de adxudicación sexa atendida inmediatamente polos responsables da súa custodia, procederase a entrada e rexistro das instalacións da EOXI Pontevedra-Salnés nas que puidese atopase a citada documentación". "O rexistro realizaríase con auxilio policial", segundo expón CESM en relación co auto xudicial.


O xulgado require a documentación referente aos catro procedementos negociados e a calquera outro procedemento que afecte á "continuidade, modulación ou prórroga dos servizos do contrato de 'Servizo de xestión integral da comunicación corporativa', co fin de coñecer o alcance exacto das adxudicacións", destaca CESM.


Os feitos denunciados relatan que entre os anos 2009 e 2018, sendo xerentes da EOXI Pontevedra-Salnés José Manuel González Álvarez e José Ramón Gómez Fernández, "adxudicouse mediante procedemento negociado a senllas empresas privadas o 'Servizo de xestión integral da comunicación corporativa do CHOP', cando xa existía un gabinete de comunicación propio do complexo hospitalario cun xornalista á fronte e coa súa praza en propiedade no Sergas como técnico do Grupo A", expón CESM.   



"Estas empresas externas realizarían o mesmo traballo que o gabinete de comunicación, polo que se estarían incumprindo as normas administrativas sobre contratación", destaca o sindicato médico.


MALVERSACIÓN

CESM Galicia entende que houbo unha "malversación de diñeiro público, ao subcontratar e gastar innecesariamente preto de 300.000 euros en senllas empresas privadas para a prestación dun servizo de comunicación, cando a propia Administración xa dispón dun gabinete de comunicación propio desde fai máis de 20 anos", para prestar este servizo, "con persoal funcionario/estatutario", matiza.


Así, o sindicato médico considera, ademais, que "se vulnerou a Lei de Contratos do Sector Público xa que ningún dos procedementos para as contratacións cumpriu os principios de transparencia, libre concorrencia, equidade e competitividade, imperativos en calquera acto de contratación pública". "Estas contratacións obedecen unicamente a un trato de favor cara a unha persoa afín ao partido político do xerente, para así controlar as actividades de propaganda", conclúe CESM.


Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress