Alta para un dos menores feridos no choque no que morreron tres menores preto de Rande

O mozo condutor, que non deu positivo nas probas de drogas e alcol, segue hospitalizado.

Un dos menores que resultou ferido no accidente ocorrido o mércores na AP-9, á altura da parroquia viguesa de Teis e que custou a vida a tres estudantes, recibiu este venres o alta hospitalaria.

Bombeiros recuperando o coche sinistrado | TVG

Así o confirmaron fontes do Hospital Vithas Nosa Señora de Fátima, onde fora trasladado o mozo con politraumatismos. O menor foi atendido nos servizos de Urxencia e de Traumatoloxía deste centro médico.

Este mozo, que viaxaba de copiloto no turismo, foi un dos dous ocupantes do coche que resultou ferido. O outro ferido, o condutor, M.M.V., de 18 anos de idade, permanece ingresado no Hospital Álvaro Cunqueiro da cidade olívica

.

Nese sinistro perderon a vida tres estudantes, que viaxaban na parte traseira do vehículo, dúas mozas e un mozo, todos estudantes do IES Mendiño de Redondela, onde as clases están suspendidas ata o luns.

Púxose en marcha un dispositivo de apoio psicolóxico tanto para as familias das vítimas como para os profesores e alumnos do centro.

O Delegado do Goberno en Galicia, Javier Losada, apuntaba nas últimas horas ao exceso de velocidade como posible causa do sinistro, no que o turismo se saíu da vía e envorcou tras impactar contra un alicerce e un gardarraíl. O condutor do coche deu negativo nas probas de alcoholemia e drogas.