Vigo é unha das cidades máis limpas mentres A Coruña e Lugo están entre as máis suxas, di a OCU

|

Pontevedra e a cidade olívica soben 19 e 17 puntos nos últimos 25 anos, mentres a capital herculina descende outros 19


Vigo é a cidade que obtén a mellor valoración da limpeza por parte dos seus cidadáns, con 76 puntos. Mentres, A Coruña (42) e Lugo (40) sitúanse entre as máis sucias, segundo un estudo realizado pola Organización de Consumidores e Usuarios (OCU) sobre os servizos municipais de 60 municipios.



Contedores de lixo en Vigo

Contedores en Vigo


Do informe despréndese que a limpeza viaria nas principais cidades españolas empeorou. A valoración media que dan os usuarios descendeu de 55 a 53 puntos. Oviedo segue liderando este ránking no que Barcelona obtén un aprobado raspado e Madrid está por baixo da media.


Oviedo é unha vez máis a cidade que obtén a mellor valoración da limpeza por parte dos seus cidadáns con 79 puntos. Séguenlle Bilbao (77), Vigo (76) e Logroño (74). Pola contra, as cidades de Conca (36) Alcalá de Henares (36) Alacante (34) e Xaén (31) son as que peores resultados obteñen. A metade das cidades do estudo obteñen unha valoración por encima de 50, o resto suspende.


OCU realiza cada 4 anos un estudo sobre a limpeza nas cidades. Para a súa realización OCU ten en conta, por unha banda, os datos proporcionados polos diferentes concellos (16 deles non facilitaron ningunha información) e doutra unha enquisa á que responderon 5.260 veciños na que dan a súa valoración sobre diferentes aspectos relacionados coa limpeza da súa cidade.


No estudo tivéronse en conta diversos parámetros como son o tipo de xestión, o orzamento por habitante, os recursos empregados a partir da información facilitada polos responsables municipais e contrástase coa satisfacción que os veciños teñen coa xestión da limpeza na súa cidade e con aspectos concretos, como a situación da limpeza en rúas e beirarrúas, o estado de parques e xardíns, os excrementos animais, a contorna dos contedores, a contaminación, e a limpeza nos barrios da periferia.


COMPARACIÓN CON hAI CATRO ANOS

Se se comparan os resultados cos obtidos en 2015, 39 das 60 cidades do estudo obtiveron unha valoración máis baixa. De media, a satisfacción baixou de 55 a 53. A evolución foi dispar, 18 cidades melloraron a puntuación obtida hai 4 anos. Así, Castelló obtivo unha mellora de 8 puntos e sobre todo Huesca, que aumentou en 12 puntos a satisfacción dos seus veciños.


No lado oposto sitúanse Ávila e A Coruña, con 16 puntos, e sobre todo Guadalaxara cunha caída de 17 puntos. Respecto das grandes cidades, Barcelona (51) aproba pola mínima, aínda que perdeu 8 puntos respecto a 2015. Madrid (39) obtén un suspenso, aínda que mellorou levemente en comparación co último estudo.


O TEMPO DE GALICIA AXUDA

A situación xeográfica e o clima poden axudar á limpeza das cidades. Así, as cidades situadas no noroeste teñen un índice de satisfacción superior, pero non o garante. Hai sonoras excepcións como é o caso da Coruña e Lugo. O maior número de papeleiras ou os diferentes medios empregados (humanos, mecánicos) non ten unha correlación directa coa satisfacción dos seus veciños. Tampouco o orzamento empregado, que vai desde os 32 euros por habitante de Xixón (68) aos 106 euros de Barcelona (51).


O modelo de xestión empregado, maioritariamente con concesións a empresas privadas, non determina unha maior satisfacción, pero si ten relevancia no orzamento municipal destinado a estas tarefas: o gasto medio por veciño elévase de media a 68 euros cando é xestionado por unha empresa privada, fronte os 48 euros que destinan os concellos que o xestionan de forma directa.


PINTADAS E EXCREMENTOS

Do estudo de OCU despréndese que a presenza de excrementos animais na vía pública, as pintadas e a sucidade na contorna dos contedores son os factores que máis inciden nunha valoración negativa por parte dos usuarios.


En determinadas cidades tamén preocupa a existencia de puntos negros --problemas co botellón, mercadillos, ou certo abandono de barrios periféricos-- aínda que en relación co estudo de 2015, un 11% menos de veciños destacan a existencia destes puntos negros.


OCU comparou a evolución nos últimos 25 anos E Bilbao é a cidade que máis mellorou neste período, cun aumento de 31 puntos na satisfacción dos seus veciños. Séguenlle Pontevedra e Vigo que subiron 19 e 17 puntos respectivamente. Todo o contrario que A Coruña, Palma de Mallorca e Tarragona que descenderon en 19 puntos durante este período.

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress