Teatro para mostrar o talento das persoas con discapacidade da man de Branca Marsillach (Vídeo)

A compañía de teatro de Branca Marsillach traerá a Galicia os seus esforzos por facer visible o talento das persoas con discapacidade. En concreto, Varela Producións representará a obra "Se vende Ático " o próximo día 15 de marzo ás 11:00 horas na Fundación Barrié da Coruña.

"É unha iniciativa única e diferente onde queremos apoiar unha sociedade diversa no teatro e apoiar o talento", explica a coñecida actriz a Galiciapress.

Unha traxectoria de inclusión que conta con máis de dez anos de experiencia polos escenarios de toda España. Nesta ocasión sae de xira por Cartaxena, Madrid, Bilbao, Tarragona e A Coruña co lema "Diversidade a Escena" e co patrocinio da Fundación Repsol .

Segundo datos da organización, máis de 10.000 espectadores de centros de toda España beneficiáronse deste proxecto para fomentar a integración deste colectivo a través da cultura. Sen dúbida, unha gran oportunidade para fomentar a igualdade de oportunidades para todas as persoas.