Chega a epidemia de gripe e a campaña de vacinación segue activa unha semana máis

O Servizo Galego de Saúde (Sergas) mantén activados os plans de continxencia para atender o "incremento da demanda asistencial ou aumento da necesidade de ingreso hospitalario" con motivo da actividade gripal en Galicia.

Segundo informou a Consellería de Sanidade nun comunicado, os datos dos sistemas de vixilancia "indican esta semana unha actividade gripal en ascenso que reflicte o inicio da onda epidémica desta tempada".

O obxectivo destes plans de continxencia, concreta Sanidade, pasa por "establecer a coordinación entre servizos e recursos de Atención Primaria e hospitalaria, así como con Urxencias Sanitarias de Galicia-061 para optimizar a atención á gripe e ás súas posibles complicacións".

Os plans oriéntanse ao "fortalecemento de actuacións de valoración preventiva desde Atención Primaria dos pacientes con maior complexidade e maior risco (como os pluripatológicos ou pacientes fráxiles)", indicou Sanidade, así como a habilitación de dispositivos "para o seu manexo e control", puntualizou.

Deste xeito, establécense varios niveis de actuación como medidas preventivas e medidas de actuación ante o incremento da demanda de hospitalización, abundou a Consellería.

VACINACIÓN
Sanidade lembra que a vacinación "é a medida principal para evitar a enfermidade", polo que a Consellería decidiu prorrogar ata o próximo 25 de xaneiro a campaña.

Desde o inicio da campaña o día 22 de outubro e ata o 15 de xaneiro administráronse 558.468 vacinas, o que supón 28.247 dose máis que o ano pasado.

No caso concreto das persoas de 65 anos ou máis, están xa vacinadas 390.681, o que supón que hai 8.763 máis vacinadas deste grupo de idade que en toda a campaña do ano pasado.

En canto ás embarazadas administráronse, segundo os datos de Sanidade, 6.190 vacinas, o que implica un 172% de dose máis que o exercicio pasado. A cobertura neste colectivo, engade, "está próxima ao 45%, superando ao 26% no que se situou a pasada campaña".

Tamén se incrementou a cobertura do persoal sanitario, con 14.629 vacinas administradas, o que supón un 132% máis que o ano pasado.