Arxentina lembra a Castelao a ritmo de muiñeira

|

Buenos Aires, a outrora considerada ‘Quinta Provincia’ de Galicia, lembrou a Castelao no 69 aniversario da súa morte. O escritor, debuxante e político, unha das figuras máis importantes da cultura galega do S. XX, estivo exiliado en Arxentina, onde faleceu en 1950 no Centro Galego de Buenos Aires.


Imaxe do busto de Castelao na praza que leva o seu nome en Buenos Aires.



O son das gaitas marcou o inicio da homenaxe a Alfonso Daniel Rodríguez Castelao que a Federación de Asociacións Galegas da República Arxentina (Fagra) celebrou este sábado en Buenos Aires no 69 aniversario da súa morte.

Preto de un centenar de persoas asistiron á praza céntrica que leva o seu nome na capital arxentina para lembrar ao histórico político galeguista ao ritmo de muiñeiras, xotas e pasodobres, así como do himno oficial de Galicia.

Bandeiras galaicas, arxentinas e a tricolor española ondearon mentres se realizou a tradicional ofrenda floral aos pés do busto que Castelao ten a escasos metros da avenida 9 de xullo de Buenos Aires.

O presidente da federación, Diego Martínez Duro, sinalou que xa é hora de deixar de "traizoar" os desexos e principios que o escritor rianxeiro defendeu en vida.

"Hai 69 anos Castelao morría aquí en Buenos Aires. Algúns que non pensaban como el leváronllo a Galicia. Algúns que dicían que pensaban como el deron o visto e prace para levarllo, aínda que el só quería volver a Galicia cando esta sexa realmente libre e creo que é hora de non volver traizoalo máis", apuntou Martínez Duro.

Con estas palabras, o director de Fagra referíase á polémica xurdida en 1984, cando os restos mortais de Castelao foron trasladados desde o panteón do Centro Galego de Buenos Aires, onde faleceu o 7 de xaneiro de 1950, ao Panteón de Galegos Ilustres, situado na igrexa de Santo Domingo de Bonaval en Santiago de Compostela.

Martínez Dura remarcou, ademais, que nun tempo no que "está a discutirse moito en Galicia sobre o patrimonio cultural" creado polos galegos no exterior, especialmente en Arxentina, é importante "demostrar que esta colectividade está viva".   

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress