Así informou a TVG da morte de dous pacientes nos corredores do CHUS

O 11 de xaneiro, cando saltou a noticia da denuncia ante a fiscalía do falecemento de dous pacientes nos corredores do Hospital Clínico Universitario de Santiago de Compostela, o Telexornal do Mediodía de  a Televisión de Galicia dedicou tan só 30 segundos a informar do suceso.

Os corredores do CHUS colapsados

DOBRE DE TEMPO PARA O CONSELLEIRO

A peza informativa do Telexornal Mediodía do venres, cunha duración de apenas 30 segundos, recolle as declaracións da profesional sanitaria que informou dos feitos ante a fiscalía, durante a súa comparecencia na comisión de investigación alternativa de a oposición.

En cambio, a noticia posterior, coas declaracións do conselleiro Vázquez Almuiña, ten unha duración que duplica á dos falecidos no CHUS, dando así prioridade informativa ás palabras do Conselleiro de Sanidade, que non fai mención en ningún momento á morte dos pacientes nos corredores do complexo hospitalario.

Ademais, en titulares non aparece a noticia da denuncia dos falecementos ante a fiscalía.

O SÁBADO SÓ SAÍRON O CONSELLEIRO E FEIJÓO

Pola contra, no Telexornal Mediodía do sábado a noticia si aparece en titulares, pero informando só de que a Xunta nega a morte dos dous pacientes nos corredores e que apoia a versión ofrecida pola dirección do CHUS.

A peza é de máis dun minuto de duración, o dobre que a denuncia orixinal. Recolle exclusivamente as declaracións de Vázquez Almuiña e Feijóo, que se apoian no comunicado do complexo hospitalario e negan os feitos denunciados, recalcando que se seguiu correctamente o protocolo de actuación e que o SERGAS mantén aberta unha investigación.

Nesa mesma peza só recóllense as impresións de dous dirixentes do goberno do PP, sen facer mencion ás declaracións de a oposición ou dos sindicatos médicos denunciantes.  

O Telexornal Mediodía é o máis visto e líder dos informativos televisivos en Galicia, e por tanto a principal fonte de información da cidadanía a nivel cuantitativo.