É mellor vacinarse contra a gripe dúas semanas antes de que comece a epidemia
Lucía Alvela, doutora en Medicina Interna do Hospital HM Rosaleda de Santiago recomenda vacinarnos “antes de que o virus comece a propagarse”, xa que a vacina empezará a ser eficaz ás dúas semanas da inmunización. O SERGAS informou que o pico da epidemia anual está por chegar, polo que aínda estamos a tempo.
Lucía Alvela
Desgraciadamente, España segue moi lonxe dos obxectivos establecidos pola OMS. Son moitas as persoas que aínda desconfían da eficacia desta vacina ou restan importancia a pesar de que pode carrexar graves consecuencias e mesmo poñer en risco a vida.
MENOS COBERTURA DE VACINAS DA RECOMENDADA
A OMS establece unha cobertura mínima de vacinación do 75% para a poboación maior de 65 anos e no noso país ningunha comunidade autónoma alcanzou o pasado ano o 60%. “Trátase dun asunto preocupante que nos debería facer reflexionar, xa que a única ferramenta eficaz para o control desta enfermidade estacional é a vacinación”, insiste a Dra. Alvela.
Alvela recomenda a vacinación a dous grandes grupos. Sobre todo, persoas que teñen un alto risco de complicacións en caso de padecer a infección e persoas que, pola súa actividade profesional ou persoal, poidan transmitir a gripe ao grupo anterior.
Escribe o teu comentario