O Celta volve á carga contra Abel Caballero

A guerra sen cuartel que manteñen club e concello vive un novo capítulo de acusacións cruzadas.

Mouriño e Abel Caballero xuntos

Novo episodio no culebrón e tiras e afrouxas entre o Celta de Vigo e Abel Caballero, alcalde da cidade. A enésima entrega deste enfrontamento entre o gobernador local e Mouriño, presidente da entidade celeste, deixa outro capítulo de acusacións cruzadas, co Celta contratando espazos publicitarios para atacar a Caballero.

Por medio dun espazo na prensa local, un recurso que a dirección do cadro olívico xa utilizara hai unhas semanas como resposta ás acusacións do alcalde sobre a construción do novo complexo deportivo en Mos, o equipo emitiu unha nota na que cuestiona ao edil vigués por interferir en varios proxectos do club.

A misiva arrinca sinalando que Caballero “faltou á súa palabra, mentiunos aos vigueses e aos celtistas” e que no pasado “fomos con vostede da man para construír o noso futuro en Vigo. Por que nos traizoou?”. Ademais acusa ao “Sr.Alcalde”, como se refire no comunicado, de paralizar o proxecto do club en Valladares. “Explíquelle claramente ao RC Celta e á cidade por que o paró”, solicita o club, que tamén advirte que freou dous proxectos en Bembrive, o proxecto nos terreos da antiga Fábrica de Álvarez e o proxecto da Universidade do Deporte no Colexio Fogar.

Por último, o Celta termina preguntando ao alcalde “Por que non nos deixou crecer en Vigo? Por que nos botou de Vigo?”. Seguro que esta interminable disputa ten, polo menos, un capítulo máis, coa resposta do ‘Sr. Alcalde’.