Abel Caballero alerta que Mos quere "anexionarse" parte de Vigo

A polémica polo traslado do Celta non é a única fronte de batalla entre a cidade, gobernada polo PSOE, e o seu veciño, gobernado polo PP; existe tamén un problema de lindes e, en consecuencia, quen debe cobrar algúns tributos

O alcalde de Vigo, Abel Caballero, denunciou este mércores o intento do Concello de Mos de "mover os marcos" e "anexionarse" parte do termo municipal vigués, en concreto, case 50.000 metros cadrados no límite entre ambas as localidades, no chamado polígono de O Rebullón.

Segundo explicou o rexedor olívico en rolda de prensa, o concello veciño notificou ao goberno municipal vigués un acordo plenario para o inicio dun expediente de deslinde e a creación dunha comisión para ese efecto. Dita medida afecta a unha parcela de 49.674 metros cadrados, nos que están instaladas unha vintena de naves empresariais.

De feito, detallou Caballero, existe un contencioso en marcha porque Mos leva anos cobrando o IBI a esas empresas, a pesar de que o seu Plan Xeral de Ordenación Municipal non as inclúe dentro dos seus límites territoriais. Así, o Concello de Vigo reclama ao consistorio veciño uns 20.000 euros dese imposto cobrado nos últimos 5 anos.

Abel Caballero advertiu de que "de ningunha maneira" o Concello olívico vai tolerar esa "manifesta ilegalidade", e cuestionou mesmo se ese acordo plenario podería supoñer a nulidade do PXOM de Mos. "Que se esquezan", proclamou, e lembrou que os límites municipais son fixados polo Instituto Xeográfico Nacional e polos propios plans de ordenación de cada concello.

"Menos mal que non lles deu por chegar á Puerta de Sol", ironizou o alcalde, quen sinalou que o Concello de Vigo xa trasladou a súa oposición a esta decisión "medieval" tanto a Mos como ao propio Instituto Xeográfico Nacional. "Á vista disto, enténdense moitas outras cousas", sentenciou o rexedor vigués.