A Xustiza manda cesar dos seus postos a 160 funcionarios por "dedazos"
Uns 160 nomeamentos en comisión de servizo no Concello da Coruña son nulos. Así o ditaminou unha sentenza do xulgado do Contencioso número dous da capital herculina.
Uns 160 nomeamentos en comisión de servizo no Concello da Coruña son nulos. Así o ditaminou unha sentenza do xulgado do Contencioso número dous da capital herculina.
Rolda de prensa da CIG cando presentou a demanda que gañou agora
A xustiza dá así a razón ao sindicato CIG. A central denunciou os "dedazos" do Goberno Local esta primavera.
A sentenza afecta a postos repartidos tanto no mandato de Xulio Ferreiro (Marea Atlántica) como anteriores alcaldes (Carlos Negreira do PP e Javier Losada do PSOE). Cando presentou a demanda a central nacionalista acusou ao actual executivo de tirar deste procedemento máis que os anteriores.
"O certo é que este Goberno está a levalo ao extremo, convertendo algo que debería de responder a motivos de urxencia e necesidade en algo habitual", declarou en maio o secretario de Sección Sindical, José María Calatayud. Segundo datos da central, dun persoal de 1.500 traballadores, había unhas 200 comisións de servizos, das cales unhas 150 eran "irregulares".
Por agora o Concello da Coruña non valorou a sentenza. O certo é que tampouco o fixeron os grupos da oposición.
A sentenza obriga a que os funcionarios volvan aos seus postos de traballo anteriores, antes de lograr as comisións de servizo. A lei marca que as comisións de servizo deben ter unha duración máxima de dous anos, precepto que se violou segundo a CIG. O fallo é recurrible no prazo de 15 días.
Escribe o teu comentario