A SD Outeiro de Rei quitará o anuncio porque "ninguén está dacordo con que haxa puticlubs"

O equipo de fútbol de Outeiro de Rei prevé quitar o valo publicitario que anuncia un club de alterne no campo de xogo, de titularidade municipal. Aínda que aínda non está pechada a decisión, o secretario do club, Carlos Suárez, explicou que entende que "haberá que quitar o cartel para evitar" que a "xente non estea a gusto": "Non imos crear un conflito".

Mentres, o BNG propuxo que o Concello de Outeiro de Rei (Lugo) substitúa o cartel do local de alterne por un valado de publicidade institucional contra a violencia machista, tendo en conta que se achega o 25 de novembro e serviría para "apoiar" esta causa.

En declaracións a Europa Press, o secretario do equipo de fútbol sostivo que "nunca houbo problemas", pero que evitarán "crear un conflito". "Perderemos o diñeiro, haberá que sacalo doutra banda", dixo, asegurando que non era "grave" ter que buscar o financiamento doutra banda.

Aínda que non aclarou --a preguntas-- canto supoñía economicamente ese valado, o secretario do club manifestou que "non van deixar de vivir" por esa contía e recoñeceu que, como leva "moitos anos", non se pararon " a pensar que puidese xurdir" unha polémica.

"Vendo a polémica, xa buscaremos algo. Ninguén se parou a pensar, como ese local levaba moitos anos... Fóra diso, está claro que ninguén está de acordo con que haxa puticlubs", manifestou. "Unha vez visto, se xera polémica no pobo, a solución é quitalo, para evitar o conflito", aseverou.

O rexedor de Outeiro, José Pardo (PP), confirmou a Europa Press que xa falou con algúns dirixentes do club. O que lle trasladaron era que "non tiñan problema en quitalo", pero falta que adopten a decisión.

O BNG, que denunciou esta situación, tamén pide ao concello que regule a utilización das instalacións municipais e a publicidade que se instale nelas. "Ademais do que significa publicitar o comercio de persoas con fins sexuais para unha institución, hai que lembrar que a esta instalación deportiva municipal acoden nenos e nenas que deberían estar apartados deste tipo de publicidade", sentenciou o portavoz do BNG en Outeiro, Xosé Ferreiro.