Retirada a reforma que impedía garantir que un mesmo pediatra atendese sempre aos nenos

Tras as numerosas críticas dos profesionais sanitarios e da posición, o SERGAS dá marcha atrás. A reforma legal, metida de esguello na Lei de Acompañamento dos Orzamentos, non seguirá adiante.

A Consellería de Sanidade decidiu este mércores retirar a proposta para a creación da nova categoría de pediatra de área incluída na disposición adicional da lei de medidas que acompaña aos orzamentos de la Xunta de 2019. Na práctica, a medida abría a porta a que diferentes pediatras atendesen a un mesmo menor. Un cambio importante que empeoraba a atención, pois agora  é o mesmo galeno o que fai o seguimento dos menores.

Segundo informou nun comunicado, adoptou esta decisión tras a reunión que nesta xornada mantiveron os representantes do Sergas con profesionais que participan no grupo de traballo de pediatría que se constituíu en 2017 para avaliar a atención pediátrica en Galicia.

"A Consellería de Sanidade manterá abertas todas as vías de diálogo e coas sociedades científicas para adoptar medidas consensuadas", promete o Goberno.

A forma, pouco habitual e sen negociación, pola que se lanzou a reforma era un dos motivos de protesta de sindicatos e asociacións profesionais. Con todo, o problema de fondo, o escaso número de pediatras, segue sen resolverse. Sindicatos cualificaron como a medida de "parche". 

A marcha atrás chega nun momento delicado para a política sanitaria de la Xunta, cunha Comisión de Investigación en marcha no Parlamento. Comisión que debe investigar, entre outros puntos, os recortes que sofre o persoal do SERGAS desde o inicio da crise.