Presentarase Feijóo outra vez á Xunta?

A política galega parece atrapada nas dúbidas do presidente. Primeiro dixo que dúas lexislaturas parecíanlle suficientes, presentouse a unha terceira, dubidou se marcharse ao PP en Madrid e agora os seus propios compañeiros abren o debate sobre unha cuarta. Hoxe a oposición dá por feito que o dos Peares volverá ser candidato.

As declaracións do presidente do Parlamento, Miguel Ángel Santalices, nas que deixou caer que o titular da Xunta, Alberto Núñez Feijóo, debe optar á reelección en 2020 tiveron eco este luns nas rodas dos grupos con representación no Pazo do Hórreo.

Así, o portavoz popular na Cámara, Pedro Puy, evitou "predicir" que fará o seu xefe de filas cando faltan dous anos para as eleccións; mentres que a oposición lamenta que o debate sobre se Feijóo volverá optar a un novo mandato centre de novo a actualidade política.

Pedro Puy evitou comentar as declaracións do seu compañeiro de partido e xefe do Lexislativo, Miguel Santalices, quen asegurou nunha entrevista na Cadea Ser que a Feijóo "non queda outra" que volver presentarse en 2020. Para o popular, dous anos na vida política "son moitos" como para aventurarse a facer "unha predición" sobre que fará o seu xefe de filas.

EN MAREA DI NON ESTAR INTERESADA

"Non nos preocupan os nomes en política, o que nos preocupan son as políticas nocivas para Galicia do señor Feijóo", indicou o viceportavoz parlamentario de En Marea, Antón Sánchez, que engadiu que o obxectivo do partido instrumental pasa por "derrotar" de maneira "democrática" o "proxecto" para Galicia que representa o PP e Feijóo, independentemente de se o titular da Xunta aspira a un cuarto mandato no ano 2020.

PSOE: "CONFIRMACIÓN OFICIOSA"

Tamén se referiu ás palabras de Miguel Santalices o portavoz parlamentario do PSdeG, Xoaquín Fernández Lecieaga, que, noutra rolda de prensa celebrada este luns, criticou que "aquel que prometía dúas lexislaturas encamíñese agora a unha cuarta".

Sobre esta cuestión, ademais, volveu a asegurar que a remodelación do seu Goberno da Xunta realizada por Alberto Núñez Feijóo permitiu ver que "a reflexión --sobre a súa candidatura en 2020-- está máis que lanzada" como, na súa opinión, dedúcese da "confirmación oficiosa" de Santalices.

BNG: FEIJÓO E A "PEONZA"

Pola súa banda, a líder dos nacionalistas galegos, Ana Pontón, criticou que o PP tente converter a política galega "nunha especie de peonza que ten que rodar ao redor das decisións de Feijóo", un presidente que, ao seu xuízo, "é pasado".

"Non ten ningún proxecto para o país, é o responsable duns servizos públicos deteriorados, multiplicou a débeda por tres...", censurou Pontón, que asegurou que o que necesita Galicia é "desfacerse de Feijóo".

E é que, segundo indicou, en Galicia a xente nova "ten que emigrar, soben as listas de espera e hai unha precariedade brutal". "Iso é o que debería preocupar ao Goberno galego", sinalou.