Alcalde declara no xulgado por cobrar dietas mentres estaba en Lourdes

José Dafonte está a ser investigado por pasar dietas sen que ata agora o Concello achegase documentación que probe os gastos.

José Dafonte

O alcalde do municipio coruñés de Trazo, José Dafonte (PP), foi chamado a declarar en calidade de investigado por oun suposto cobro irregular de dietas do Concello e por mor dunha denuncia presentada polo PSOE local.

Segundo as fontes consultadas por Europa Press, o alcalde e a secretaria do Concello foron chamados a declarar o pasado 5 de outubro, pero o avogado da acusación pediu a suspensión porque faltaba "o expediente" que se requiriu ao Concello, é dicir, a información sobre o cobro das dietas.

Posteriormente, tratáronse de fixar outras dúas novas datas (o 29 de outubro e o 16 de novembro), pero en ningún dos dous casos podía a defensa, polo que está pendente de pecharse a citación do rexedor.

ACUSACIÓNS DA OPOSICIÓN

En declaracións a Europa Press, a portavoz do PSOE local, Beatriz Domínguez, explicou que a pesar das peticións realizadas polo seu grupo, "non viron nada que xustifique o cobro" das dietas e advertiu que algunhas desas compensacións "ou se duplican ou non son reais".

Pola súa banda, fontes do PP da Coruña manifestaron a Europa Press o seu "respecto polos procesos xudiciais e a independencia xudicial", así como pola "presunción de inocencia", pero non quixeron entrar a valorar este caso neste momento procesual.

O pasado mes de xuño, o PSOE anunciou a súa denuncia polo cobro de dietas por "supostas visitas institucionais" a Santiago de Compostela realizadas en datas nas que tiña delegadas as súas tarefas por atoparse de vacacións e de viaxes en Lourdes (Francia) no País Vasco. Os socialistas tamén puxeron en coñecemento do Valedor do Pobo e o Consello de Contas esta situación.