O Festival O Son do Camiño 2018 desembarca en seis cidades tras o éxito en Santiago

Nomes internacionais como The Hives ou José González están no cartel dunha serie de actuacións presentadas hoxe. 

Son do Camiño en Monte do Gozo | Eva Neira

Seis concertos de recoñecidos artistas nacionais e internacionais completarán este outono a programación de O Son dO Camiño 2018, o festival co que Galicia promove a celebración do Xacobeo 2021. Despois da celebración do festival en Santiago, as novas citas musicais ampliarán o seu alcance ao resto de cidades da Comunidade, situadas en diversos itinerarios xacobeos.

O cartel estará protagonizado por The Hives, na Coruña, e Miguel Poveda, en Ferrol, ambos os concellos do Camiño Inglés. En Lugo, cidade pola que discorre o Camiño Primitivo, recalará Pablo López, mentres que en Ourense, na Vía da Prata, actuará Rodrigo Leão.

Finalmente, José González pasará por Pontevedra, no Camiño Portugués, e Mon Laferte por Vigo, no Camiño Portugués da Costa, pechando así a programación da primeira edición do evento.

As seis citas terán lugar ao longo dos meses de outubro e novembro, cunha proposta que dá continuidade ao festival, que congregou a 84.000 asistentes de 12 países no Parque Monte do Gozo.