Un bebé ingresado por consumo de haxix

A Xunta xa se fixo coa custodia do neno, de 16 meses. A familia alega que todo foi un accidente nunha terraza.

Balseiro, delegado provincial da Xunta

O delegado territorial da Xunta en Lugo, José Manuel Balseiro, confirmou este luns que o goberno autonómico está "en estrita colaboración e a disposición da Fiscalía e do xulgado para preservar a integridade física e o benestar do menor" que foi hospitalizado no HULA por intoxicación por inxerir haxix.

A Xunta asumiu a custodia do bebé de 16 meses mentres se investiga se foi unha inxesta accidental ou existiu unha facilitación directa da droga. Pola súa banda, a nai recorreu esta medida, argumentando que o neno puido coller a substancia por erro do chan cando se atopaban nunha zona de terrazas en Vilalba.

Balseiro explicou que é "un tema que está baixo supervisión xudicial, polo que a Xunta actuará en consecuencia ao que se determine desde o xulgado".

Foi o pasado martes de madrugada cando a nai e a súa parella comprobaron que o bebé comezaba a actuar de forma estraña e sufría espasmos, polo que decidiron levalo ao centro de saúde de Vilalba, de onde foi trasladado ao HULA.