Continúa a folga do 061 mentres Sanidade defende que "escoita, dialoga e chega a acordos"

|

O conselleiro de Sanidade, Jesús Vázquez Almuiña

Jesús Vázquez Almuiña


O conselleiro de Sanidade, Jesús Vázquez Almuiña, defendeu que o Sergas "escoita, dialoga e chega a acordos" cos traballadores do 061, que impulsaron protestas en contra do traslado do seu centro de traballo á Estrada.


"Preocupámonos, escoitamos, negociamos e chegamos a acordos", defendeu, en resposta á parlamentaria nacionalista Montse Prado, quen censurou a actitude da Xunta e incidiu no "cambio" que o traslado supón para as condicións dos traballadores.


Pola súa banda, o conselleiro, lembrou que representantes da Consellería de Sanidade e do Sergas, así como do equipo directivo da Fundación Pública Urxencias Sanitarias de Galicia-061, mantiveron cinco reunións no contexto da negociación polo cambio do centro de traballo.


Entre os puntos recolleitos no borrador de acordo, incidiu que se atopa a oferta para os traballadores fixos e eventuais con continuidade dunha compensación económica de 140 euros brutos en 12 pagas mentres continúen prestando servizos no mesmo centro de traballo.


Ademais, os traballadores non sanitarios poderán elixir para o seu goce os días festivos correspondentes ao Concello de Santiago ou, no seu caso, ao da Estrada.


PLANIFICACIÓN SANITARIA

Tamén en materia sanitaria, en resposta a Eva Solla (En Marea), quen denunciou "recortes" en persoal e peche de camas, Almuiña defendeu a "planificación" do Sergas e advertiu que, en determinadas especialidades, hai "listaxes de contratación que quedan baleiros", o que deixa "sen posibilidade de contratar".


Na mesma liña, o presidente da Xunta, Alberto Núñez Feijóo, xa indicara que isto sucede coa medicina de familia e pediatría.


Tamén Almuiña remarcou que o Sergas adoptou medidas como o "aumento da oferta de prazas" MIR e subliñou que pediu ao Ministerio un compromiso para "flexibilizar e axilizar" o proceso de acreditación de prazas de novo ingreso de formación especializada en Pediatría, co fin de "incrementar a oferta e os profesionais para a contratación de máis pediatras".


AUMENTO DA ACTIVIDADE ESTE VERÁN

O conselleiro, quen tamén defendeu os avances da ampliación do Hospital de Montecelo en resposta ao popular Jacobo Moreira, subliñou, así mesmo, que a actividade do Sergas en xullo e agosto deste ano evidencia "un incremento en todas as áreas asistenciais".


"Realizáronse 181.943 consultas máis que no verán de 2017, o que supón un incremento do 4,1 por cento", proclamou, antes de remarcar que, ao seu modo de ver, estes datos evidencian que o Sergas garante a atención sanitaria "en todos os ámbitos asistenciais, tanto en Atención Primaria como hospitalaria durante todo o ano".


Con respecto da cirurxía realizada entre xullo e agosto de 2018, fixéronse máis de 26.800 intervencións aumentando nun 2,7 por cento en comparación coas realizadas o ano anterior neste período. Así mesmo, na área de probas, aumentouse nun 1,8 por cento o número respecto de 2017.


"Quero insistir en que no Sergas non se pechan camas durante o período estival, todas están ao cento por cento dispoñibles e de acordo coa demanda asistencial úsanse as necesarias en cada momento", reivindicou, antes de concluír que os datos proban que "o sistema funciona".


Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial
Powered by Bigpress