Rexeitada a moción contra a mina de Touro cos votos en contra do PP

|

Moises branco pp

O deputado popular Moisés Branco | Imaxe: PP O Barco de Valdeorras


O PP acusou este martes a En Marea de buscar que a Xunta "prevarique" rexeitando directamente o proxecto mineiro de Touro e sen "seguir a tramitación legal" do proxecto que, advertiron os populares, non se autorizará "se non cumpre con toda a normativa".


Así o dixo o deputado Moisés Branco durante a súa intervención ante unha moción presentada polo grupo de En Marea contra o proxecto mineiro de Touro, que finalmente foi rexeitada cos votos en contra dos populares.


O punto da iniciativa que creou unha maior controversia foi o oitavo, no que En Marea reclamaba á Xunta que, "unha vez recibidos os informes preceptivos" sobre o proxecto, "a maioría moi críticos", dese por "pechado o procedemento de autorización" e ditaminase "unha avaliación ambiental negativa e non emendable", rexeitando, por tanto, de maneira "definitiva" o proxecto mineiro.


Este apartado foi cualificado polos populares de "antidemocrático" e levou a Moisés Branco a acusar a En Marea de buscar que a Xunta "prevarique" e de querer que un proxecto como o de Touro non "se tramite conforme á normativa vixente, como calquera outro".


"Estamos tolos? Que barbaridade está a propoñer?", dixo o deputado popular, que asegurou que a Xunta "seguirá cumprindo a lei" e tramitará este proxecto de forma ordinaria. Tras lembrar que o propio conselleiro de Economía adiantou que, "tal e como foi presentado non é viable", Branco garantiu que o proxecto "non se autorizará se non cumpre con toda a normativa", pero instou a seguir as canles normais do proceso.


Este argumento foi esgrimido tamén pola socialista Patricia Vilán, cuxo grupo se abstivo na votación do punto oitavo da moción, que se realizou por separado, ao rexeitarse a súa emenda para modificalo.


"Nós cremos que, despois dos informes preceptivos, fai falta cumprir de forma escrupulosa a normativa mineira", dixo Vilán, que, con todo, rexeitou "pedirlle a ninguén que prevarique" sen ter todos os documentos. En todo caso, os socialistas opuxéronse ao proxecto mineiro argumentando cuestións como que falta informes de afección de acuíferos.


UN PROXECTO "INASUMIBLE"

Para Francisco Casal, os informes recibidos en relación a este proxecto son "tan contundentes" que "non parece posible que poidan ser modificados" e determinan que o proxecto é "inasumible".


O deputado de En Marea considerou que esta concesión "vai destruír cun risco inasumible zonas importantísimas do territorio galego", polo que instou á Xunta a "evitalo" e a "aproveitar a experiencia" para que os postos de traballo sexan para intervir na recuperación da zona afectada polo anterior proxecto mineiro


Así, a moción pedía, entre outras cuestións, que a Xunta optimizase o seu labor de control e sanción sobre as consecuencias contaminantes da mina de Touro, "transparencia" nas demandas de información en relación a proxectos mineiros ou a intervención da Consellería do Mar na redacción de informes preceptivos para este tipo de explotacións.


Ao mesmo tempo, Casal reclamou que a Xunta impulse e dote presupuestariamente un plan de actuacións de recuperación e restauración ambiental da zona, que dea prioridade á contratación dos traballadores das compañías que actualmente operan na zona, co que se "garantirían os seus postos de traballo" .


Con todo, esta opción motivou unha emenda do BNG que, en boca do deputado Xosé Luís Rivas, non viu "adecuado" que "quen se lucra dunha actividade reciba como premio unha restauración con participación pública" e rexeitou que "se pague con diñeiro de todos as barbaridades cometidas". A emenda non foi aceptada, polo que o BNG abstívose neste punto da votación.


Ao debate parlamentario asistiu unha representación de traballadores de empresas vinculadas á mina de Touro, que criticaron que algúns grupos políticos busquen "silencialos". A través dun comunicado, os traballadores aseguraron que con este tipo de iniciativas "está a poñerse en risco o seu emprego e o futuro das familias" da zona e criticaron que se estea "desinformando".


"As industrias que actualmente operan na mina e os novos proxectos non poden pagar por tempos pasados. Non representamos un problema, se non unha solución", explicaron.


Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress