O máster da ministra de Sanidade na Rey Juan Carlos, baixo sospeita

A Universidade Rey Juan Carlos (URJC) está a investigar outro máster que cursou a actual ministra de Sanidade, Carmen Montón, no Instituto de Dereito Público, clausurado tras o caso das presuntas irregularidades dos estudos de posgrao da expresidenta da Comunidade Cristina Cifuentes.

Carmen Montón, sendo deputada e portavoz de Igualdade no PSOE, superou cunha nota media de 8,43 un Máster en Estudos Interdisciplinares de Xénero na universidade pública no curso 2010/2011, a pesar de que o empezou cando a metade das materias xa finalizaran.

Pagou a matrícula fóra de prazo, tres meses despois, esuperou a metade das materias sen acudir ás clases e sen tratar cos profesores. 

A directora do máster era Laura Nuño, imputada no caso Cifuentes e número dous do catedrático que dirixía o polémico instituto, Enrique Álvarez Conde, desde decembro de 2017.

Fontes da universidade explicaron que por mor das presuntas irregularidades nos estudos de Cifuentes e do presidente do PP, Pablo Casado, decidiuse abrir en xuño unha información reservada para investigar a nivel académico toda a actividade do Instituto, que este curso xa está extinguido.

A universidade tamén cesou a Álvarez Conde, imputado no caso e que hoxe mesmo está chamado a declarar ante a xuíza que leva o caso do máster de Cifuentes e Casado, e agora, ademais de investigar os estudos que se cursaban, está auditando as contas do centro.