A Plataforma Casalonga Limpa organiza o festival reivindicativo DesPlanta SONS
"Temos a esperanza de ser quen de enfrontarnos aos poderosos e impedir a construción da planta. Se o conseguimos, gañariamos a primeira batalla, pero non a guerra"
O venres 7 de setembro a partir das 20.30h o Campo dá Festa do Carmelo (Ameneiro-Teo) acollerá o DesPlanta SONS, un festival solidario e reivindicativo organizado pola Plataforma Casalonga Limpa de Residuos.
O obxectivo do evento, que coincide co fin da misa de inauguración das festas do municipio, ten como obxectivo reivindicar a través da música que Teo é "un lugar para vivir, non para residuos".
O público infantil poderá gozar de inchables gratuítos e da música do Capitán Garfo, mentres que ao escenario principal subirase o grupo coral de mulleres Son Elas, que dará paso á música tradicional e folk de Tres Pesos e Vos D'Abaixo. O metal de Deseqilibrio Mental e o rock dos John Deeres pecharán a xornada festiva-reivindicativa.
"Temos a esperanza de ser quen de enfrontarnos aos poderosos e impedir a construción da planta. Se o conseguimos, gañariamos a primeira batalla, pero non a guerra", sinala Casalonga Limpa. "A guerra", continúa, "só a gañaremos cando a canteira e a súa contorna, sexan quen sexa os propietarios, acompañen nosas vidas no canto de ameazalas".
Escribe o teu comentario