Detido o presidente da Deputación de Valencia (PSOE)
A causa abriuse por presuntos delitos de prevaricación administrativa e malversación de caudais públicos en maio 2018.
O Xulgado de Instrución número 9 de Valencia coordinou hoxe unha operación contra a corrupción na que foi detido o presidente da Deputación de Valencia e alcalde de Ontinyent, Jorge Rodríguez, e outras dúas persoas, informou o TSJCV.
A causa abriuse por presuntos delitos de prevaricación administrativa e malversación de caudais públicos en maio 2018 tras a denuncia interposta pola Fiscalía Anticorrupción de Valencia.
En concreto, investíganse irregularidades na contratación de persoal de alta dirección en Divalterra, antiga Imelsa, en 2015. As dilixencias están secretas, detalla o alto tribunal valenciano.
A actuación enmárcase e a chamada "operación Alquería", na que axentes da Unidade Central de Delincuencia Económica e Fiscal (UDEF) practicaron hoxe rexistros na Deputación de Valencia, nas dúas sedes das que dispón o Concello de Ontinyent, e na sede social de Divalterra (antiga Imelsa).
O maxistrado instrutor autorizou tamén a entrada e rexistro en varias vivendas particulares: a do presidente da Deputación e as doutros investigados.
No dispositivo, que se activou ás 07.30 da mañá con rexistros simultáneos nas distintas sedes e vivendas, participaron, ademais dos axentes da UDEF central desprazados desde Madrid, efectivos da Unidade Central de Ciberdelincuencia e da Xefatura Superior de Valencia.
Escribe o teu comentario