Pontevedra terá nova facultade de Belas Artes, pero non o edificio planeado

O alcalde de Pontevedra, Miguel Anxo Fernández Lores, recibiu este luns no seu despacho ao novo reitor da Universidade de Vigo (UVigo), Manuel Reigosa, nunha reunión institucional que serviu aos representantes de ambas as institucións para recuperar a proposta de construír unha nova facultade de Belas Artes.

Esta intención foi desvelada en rolda de prensa polo reitor, quen afirmou que a institución académica "agradece extraordinariamente" a cesión do antigo cuartel de San Fernando, actual sede da Facultade de Belas Artes, aínda que o edificio "non está a cubrir todas as necesidades" que expón a titulación, motivo polo que recoñeceu a posibilidade de estudar outras opcións, sempre dentro dunha "planificación máis a longo prazo".

Nese sentido, Reigosa subliñou a vontade da institución académica de tratar de implantar unha nova titulación no campus pontevedrés, "que aproveite as sinerxias das titulacións xa existentes".

Manuel Reigosa reiterou o seu obxectivo para o ano 2019 de "negociar coa Consellería novas titulacións". "Unha vez teñamos encima da mesa o mapa final de titulacións que haberá neste campus", sinalou, "haberá que pensar en pechar un pouco o campus universitario físico e haberá que construír", respondeu Reigosa a preguntas dos xornalistas.

Nesta liña, Reigosa recoñeceu que o antigo proxecto do Edificio das Artes é "dificilmente asumible" xa que, a pesar de ser un edificio "obviamente moi valioso", era tamén "enormemente caro". "Nós apostaremos por edificios máis sustentables, máis intelixentes e máis adecuados para o medio ambiente", concluíu.