PSdeG reclama un "plan de choque para facer fronte á anunciada fervenza de xubilacións do Sergas"

Tras a alerta lanzada por os colexios médicos de Galicia acerca da urxencia de abordar o próximo "boom de xubilacións", o portavoz do Grupo Socialista, Xoaquín Fernández Leiceaga, reclamou ao goberno autonómico un "plan de choque para facer fronte á anunciada fervenza de xubilacións de médicos e profesionais do Sergas revista para os vindeiros cinco anos".

Segundo os datos dos colexios médicos, en Galicia 2.382 facultativos teñen entre 60 e 65 anos de idade: 318 en Ourense, 744 en Pontevedra, 1.031 na Coruña e 289 en Lugo. Ante isto, o grupo socialista apunta que "non vai haber máis solución que flexibilizar as xubilacións" a curto prazo, aínda que recoñecen que "resulta máis razoable incrementar o número de profesionais dispoñibles". 

Leiceaga propón incrementar as prazas de MIR, coincidindo coas declaracións do presidente de Consello Galego de Colexios Médicos, Jose Luís Jiménez. "Hai que pensar no que necesitamos; pedir un incremento de prazas MIR e planificar co que temos", sostivo Jiménez, para engadir que "sería bo facer un pacto pola sanidade".