Executivas e la Caixa apostan pola contratación de persoas en situación de vulnerabilidade

Firma do convenio en Ourense | Imaxe: Executivas de Galicia

Excutivas de Galicia e a Obra Social "la Caixa" asinaron un convenio para fomentar a contratación de persoas en situación de vulnerabilidade en Galicia. O acordo levará a cabo a través do programa Incorpora de la Caixa, cuxo obxectivo é potenciar o tecido empresarial da comunidade.

A contratación de Incorpora diríxese a persoas con discapacidade, mulleres vítimas de violencia de xénero, paradas de longa duración, ex recluídas, mozas en situación de vulnerabilidade e inmigrantes, entre outras.

No convenio asinado onte no centro La Molinera en Ourense, Executivas comprometeuse a "fomentar a contratación e formación de persoas en situación de vulnerabilidade e a impulsar accións concretas no ámbito da responsabilidade social empresarial coas 28 asociacións que forman parte da federación".

O compromiso da entidade financeira a través de Incorpora -programa que facilitou 844 postos de traballo en 2017 grazas a 420 empresas locais- consiste en prestar información e asesoramento especializado "sobre subvencións e axudas á contratación e á creación de emprego" destes colectivos.