Leiceaga acusa á Xunta de "degradar o sistema sanitario"

O portavoz do Grupo Socialista, Xoaquín Fernández Leiceaga, acusa o goberno da Xunta de Galicia de "degradar o sistema sanitario" dificultando e acceso aos servizos e "consolidando unha sanidade de dúas velocidades".

Leiceaga alertou hoxe na sesión de control das "listas de espera excesivas na sanidade", o "abuso de concertos coa sanidade privada" e da "degradación dos servizos nos hospitais comarcais", acusando o goberno galego de combater as listas de espera "gastando máis de 200 millóns de euros anuais en derivacións a empresas privadas", o que, segundo as socialistas, provoca "que algunhas Eoxis perdan a cualificación necesaria para realizar prácticas médicas e consolidando o sector privado".

Ante a "preocupación e malestar" de profesionais e usuarias do sistema sanitario público, o portavoz presentou tres propostas concretas para desafogar a sanidade. Consolidar un catálogo de servizos para os hospitais comarcais que garanta unha serie de servizos mínimos "dentro do razoable e o posible" nun prazo de catro anos, poñer en marcha un Plan de Persoal para aumentar a dotación en sanidade para reducir á metade as traballadoras eventuais e aumentar as prazas MIR, e modificar a Lei de Garantías Sanitarias son as tres medidas expostas polo PSdG-PSOE.

Leiceaga apuntou as consecuencias das medidas sanitarias adoptadas polo Partido Popular: "a deterioración dos servizos e listas de espera disparatadas con máis de 10.000 persoas esperando para a consulta de traumatología na Eoxi de Vigo, cunha lista de espera media de 10 meses e casos de ata 3 anos".