Deteñen ao responsable de explosivos dunha mina da empresa que pretende reabrir Touro (VÍDEO)

Atalaya Minning, a multinacional que pretende abril a mina de Touro, ten a súa outro gran negocio en España en as Minas de Río Tinto, en Huelva. Alí subcontratou os labores de voaduras a Insersa. O responsable de custodiar os explosivos acaba de ser detido por roubalos.

A Garda Civil informa que o apresou na chamada operación Antracita. Un xulgado de Valverde del Camino investígao polos delitos de subtracción, tenencia, depósito e tráfico de explosivos. Os axentes atoparon nunha leira da súa propiedade 1.864 gramos de substancia explosiva (pentrita e TNT), 23 detonadores e 530 metros de tubo de transmisión para voaduras. A benemérita asegura que así se evitou que o material chegase ao mercado negro. Hai outros dous traballadores imputados.

Pola súa banda, Insersa recoñece que “as persoas relacionadas coa investigación emprendida pola Garda Civil eran empregados de Insersa cando ocorreron os feitos” e que o detido era “a persoa baixo cuxa responsabilidade estaba a custodia dos explosivos”.

Agora ben, tamén asegura que a compañía “cumpre todos os protocolos de seguridade previstos na normativa sectorial vixente en materia de explosivos que se aplican rigorosamente, contando ademais cunha empresa contratada de vixilancia para o efecto”.

Na Mina de Touro tamén está previsto facer moitas voaduras. En concreto, a mineira estima cada ano 694 voaduras de tipo A (con 9.255 quilos de explosivo para arrincar 25.000 metros cúbicos de roca cada unha) e 1.380 de tipo B (con 16.322 quilos de explosivo para desgajar 50.000 metros cúbicos cada unha).

Por agora, nin Atalaya Minning nin Cobre San Rafael, a empresa galega que controla a multinacional, comentaron a operación policial.