Atalaya Mining subiu un 60% en bolsa desde o anuncio da mina de Touro
O comezo do seu despegamento coincide no mesmo mes no que o proxecto de activación da mina de Touro publicouse no DOG.
Atalaya Mining, a principal impulsora da apertura da mina de Touro, subiu en bolsa ao redor dun 61,83% desde mediados de agosto do 2017 ata marzo de 2018. O inicio do seu despegamento coincide no mesmo mes no que o proxecto se publicou no DOGA, dando o pistoletazo de saída á oposición de decenas de asociacións, entidades científicas e veciños debido aos riscos ambientais e socioeconómicos que trae consigo.
Atalaya Mining é unha multinacional mineira que ten ao seu cargo os proxectos Touro en Galicia e de Minas de Riotinto en Andalucía. A empresa titular da histórica mina de Huelva non estivo exenta de polémica no desenvolvemento das súas explotacións, e tras non reportar beneficios entre 2012 e 2015, foi a partir de 2016 cando Atalaya Mining comezou a súa crecente melloría.
En febreiro de 2017, a multinacional interesaríase no proxecto da mina de Touro e na adquisición de Cobre San Rafael, a empresa titular dos dereitos de explotación do terreo mineiro. Despois de analizar a potencialidade da zona en materia de produción de cobre, en xuño do mesmo ano Atalaya Mining pasou a ser a principal accionista de Cobre San Rafael, chegando a controlar un territorio de ata 122,7 quilómetros cadrados, extensión que se consolida como un dos grandes temores dos detractores da mina.
Entre a adquisición de Cobre San Rafael e a publicación do proxecto no DOGA, comezou en agosto o ascenso meteórico en bolsa de Atalaya Mining, que desde o inicio do conflito viu mellorada a súa posición ao redor dun 60%.
Actualmente, a multinacional ve factible a apertura da mina a pesar das accións dos seus numerosos detractores, e considera na súa recente presentación a posibles investidores que Galicia é “prol mineira e autónoma”.
Ao longo de 2016, Atalaya Mining xerou ingresos de ata 98 millóns de euros, reportando por primeira vez en catro anos beneficios de ata doce millóns. Entre os seus activos correntes e non correntes, a empresa sumou un total de 300 millóns de euros, unha cantidade que non cesou no seu crecemento desde 2012, mentres que o total do seu patrimonio e recursos propios (Total Equity), por último, ascendeu de 63 a 188 millóns de euros de 2012 a 2016.
A falta de recursos propios e músculo financieiro foi o motivo que, no seu día, a Xunta alegou para parar a última hora o proxecto da mina de oro en Corcoesto. Unha deficiencia que, nun principio, non sofre o proxecto de Touro - O Pino.
Escribe o teu comentario