Esixen a dimisión do alcalde de Cabana por un presunto delito contra o patrimonio

Distintas entidades e asociacións da Costa da Morte, en concreto Petón do Lobo, Salvemos Cabana, Cova Crea e Ouriol de Anllóns, esixiron a dimisión inmediata do alcalde de Cabana tras verse implicado nun presunto delito contra o patrimonio. En consecuencia, as asociacións consideran a través dun comunicado que “o rexedor popular non pode seguir nin un minuto máis no seu posto”.

Tal e como indican o conxunto de entidades e a prensa galega,o titular do Xulgado de Primeira Instancia e Instrución nº1 de Carballo abriu dilixencias contra José Muiño Domínguez e outras seis persoas, debido ao traslado irregular dun hórreo a unha leira privada mentres se construía unha nova praza. A iso precédelle o rexistro que axentes do Seprona da Garda Civil realizaron este luns no Concello de Cabana, do que retiraron diversa documentación relacionada co asunto.

Os feitos remóntanse a 2015, cando se iniciou a construción dunha praza pública nun solar onde se atopaban dous hórreos centenarios, bens culturais protexidos pola lexislación autonómica e estatal.

De acordo á Asociación Petón do Lobo, a Deputación da Coruña chegou a achegar máis de 54.000 euros para a adecuación da infraestrutura e a implantación do primeiro hórreo en leira, pero no caso do segundo, tal e como explican as asociacións, “retirouse da súa zona de implantación orixinal e acabou fragmentado e amontoado na leira dun particular”, que ademais resultou ser o propietario do terreo sobre o que se edificou a nova praza.

O Seprona leva varios meses investigando o caso, que comezou con a denuncia dun veciño á Dirección Xeral de Patrimonio, e que agora parece xudicializarse e estar próximo ao seu fin.

MÁXIMA PROTECCIÓN POSIBLE

En defensa da dimisión do alcalde de Cabana, o conxunto de asociacións remítese á Lei 5/2016 do Patrimonio Cultural de Galicia, que sentencia que os hórreos son “bens de interese cultural e quedan sometidos ao réxime xurídico previsto para este tipo de bens sen necesidade da tramitación previa do procedemento”.

Tal e como explican no seu comunicado, os bens de interese cultural son unha figura xurídica de protección do patrimonio histórico-artístico tanto moble como inmoble, e por tanto deben gozar de “a máxima protección posible” no lexislativo.