“Precariedade” e “presións” no servizo de deportes da USC

O sindicato FeSMC- UXT denuncia a “situación de indefensión na que están os traballadores da Fundación USC Deportiva”. Trátase de 32 empregados con numerosos problemas laborais, que ademais levan catro anos solicitando unha reunión co padroado desta Fundación sen resposta a día de hoxe.

A central denuncia unha serie de presuntas ilegalidades. Entre outras, as diferenzas que se constatan nas condicións laborais dos traballadores; a notable redución do número de empregados nos últimos anos, o recurso reiterado ás contratacións precarias; as presións ás que ven sometidos algúns traballadores; o reiterado incumprimento de varios puntos do convenio colectivo; ou a falta de transparencia á hora de informar os representantes dos traballadores como establece a lexislación en varios supostos.

Pese a estes problemas, aseguran que a penas hai interlocución co seu empregado pois “só foron recibidos en dúas ocasións, nunha polo reitor e noutra pola vicerreitoria da USC, pero nunca como presidente e vicepresidenta da Fundación”. Reunións nas que “puideron percibir claramente que ambos descoñecían por completo o funcionamento real da Fundación e a situación actual dos seus traballadores”.

Outro sindicato, a CIG, tamén se suma ás protestas. A central nacionalista denuncia que a concesionaria dos servizos deportivos da USC “está no esquecemento dos máximos responsables da entidade”. Bruno López e Martín Vázquez, delegados de persoal, afirman que “o presidente da entidade e a vicepresidenta descoñecen por completo o funcionamento real da fundación, e que escapan da realidade delegando plenamente no seu xerente, que trata de silenciar unha situación escura e delicada”.

A denuncia das condicións laboarias e o suposto desinterese dos mandatarios chega nun momento importante, coa USC en pleno proceso electoral para elixir reitor. A Universidade aínda non respondeu a estas acusacións.