A manifestación en defensa da sanidade pública logra un apoio multitudinario

|

Mani sanidade febreiro


Máis de cinco mil persoas secundaron a manifestación convocada pola plataforma ‘SOS Sanidade Pública en Santiago de Compostela’ na que se retou "" ao presidente da Xunta de Galicia, Alberto Núñez Feijóo, a que paralice a reforma da Lei de Saúde e manteña un proceso de negociación encamiñado a frear os "recortes" e "privatizacións" na sanidade galega.


A mobilización, iniciada ás 12 do mediodía na Alameda e con presenza de cidadáns das distintas áreas sanitarias galegas e colectivos profesionais, estivo encabezada pola pancarta da plataforma, tras a que se situaron os líderes de En Marea, PSdeG e BNG (Luís Villares, Gonzalo Caballero e Ana Pontón, respectivamente) xunto cos representantes dos sindicatos CIG, Comisións Obreiras e UXT.


O portavoz da Plataforma, Manuel Martín, denunciou o "desmantelamento dos hospitais comarcais" que asegura que supoñerá a nova Lei de saúde, a situación de "colapso" rexistrado nas listas de espera e na sanidade galega "no seu conxunto" e o progresivo "proceso de privatización" do I+D+i, cos "chiringuitos que se están montando" de xestión privada.


A a actriz Isabel Risco deu lectura ao manifesto da Plataforma na Praza da Quintana, entre cánticos dos presentes de "este goberno é unha mafia", "recortes na pública, diñeiro para a privada" ou "presidente privatizador", e con presenza de pancartas alusivas a Feijóo, como a portada por veciños da zona da Mariña que situaban a súa fotografía nunha cruz, baixo a frase "o Cristo da neve".


Nesta liña, no manifesto afírmase que o proxecto de modificación da Lei Galega de Saúde "desmantelará os hospitais comarcais, dificultando o acceso á asistencia especializada á poboación rural", "perpetuará estruturas de xestión integrada que someten á Atención Primaria ás xerencias hospitalarias", "privatizará o I+D+i, acabará coa participación social para o control da Sanidade pública galega que pasará a ser unha pantomima" e "favorecerá a creación de chiringuitos de xestión".


CRITICAS DA OPOSICIÓN

O portavoz da plataforma, Manuel Martín, facéndose eco do "enorme descontento social e profesional que existe co intento de manter os recortes que se produciron nos últimos anos", lanzou o "reto a Feijóo" de manter unha reunión para ver "como paralizar a reforma da Lei e abrir un proceso de negociación no que participe a cidadanía, os profesionais, as organizacións políticas, sindicais e a administración para ver como iniciar un proceso de recuperación dos recortes que se produciron".


Martín agregou que o conselleiro de Sanidade "está amortizado", tras demostrar "unha incapacidade tremenda para xestionar a sanidade pública", polo que insistiu en que "o tema está en mans de Feijóo", que é o que "ten que recapacitar".


Pola súa banda, os membros da oposición tamén mostraron rexeitamento á xestión sanitaria da Xunta. Luís Villares, portavoz de En Marea, manifestou que a cidadanía está "farta das listas de espera, dos colapsos de urxencias, das derivacións á privada, etc”. Gonzalo Caballero, líder dos socialistas, tachou de "fracaso" as políticas sanitarias de Feijóo, por implicar "danos para unha cidadanía que quere unha sanidade pública, gratuíta, de calidade e próxima". Pola súa banda, Pontón denunciou o "recorte" en "máis de 3.000 profesionais ou 700 camas" nos últimos anos, "con repagos" e con "aumento das listas de espera", e argumentou que o PP e Feijóo usa "a maioría absoluta contra as persoas deste país". CIG, CCOO e UXT tamén participaron na manifestación, mostrando o seu total rexeitamento cara ás políticas de Feijóo, acusándoo de causar “a deterioración” do sistema sanitario galego.

relacionada Ana Pontón pide apoio masivo na "gran manifestación" pola sanidade pública
relacionada Almuiña considera que a manifestación do próximo domingo parte de “datos falsos”
relacionada ​Caballero resume a sanidade de Feijóo en: "privatizacións, precariedade e listas de espera"

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.
Cabecerarecomendadosgal 2
Cabeceraultimahora 2
Cabeceralomasleidogal 1


Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress