Renfe mantén cortada a liña rexional entre Vigo e Ourense por motivos de seguridade

Renfe informou este domingo de que os trens rexionais entre Vigo Guixar e Ourense seguirán sen circular, mentres o resto de rutas afectadas polas choivas dos últimos días recuperaron xa a súa operatividade. Pola mañá tamén permanecía cortada a conexión Vigo–Santiago, pero sobre as 10.30 horas a compañía confirmou o seu restablecemento até A Coruña utilizando a liña de alta velocidade entre Vilagarcía e a capital galega.

Plan alternativo en catro estacións

Debido ao mal estado dalgúns puntos da infraestrutura, Renfe activou un plan de transporte alternativo para os viaxeiros con orixe ou destino en Padrón, Pontecesures, Catoira e Osebe, aínda que advirte de que a situación meteorolóxica pode afectar o seu funcionamento.

O sábado, a operadora xa anunciara o regreso do servizo de alta velocidade entre Santiago e Vigo e a continuación dos trens de Media Distancia entre Vigo Urzáiz e A Coruña, despois das verificacións técnicas da vía. “A seguridade de viaxeiros e traballadores é prioritaria”, recalcaron fontes da compañía.

Discrepancia con Adif

Adif, pola súa banda, reiterou que non se detectaron danos relevantes na infraestrutura e que a suspensión se mantén “por decisión de Renfe”. A compañía ferroviaria matiza que a medida responde á persistencia de “riscos repentinos” derivados do temporal, tras contrastar a información de varios organismos públicos.

A circulación cara a Ourense permanecerá interrompida até nova revisión. Renfe non precisou unha data para o seu restablecemento e condiciona a continuación ao resultado das inspeccións que levan a cabo este domingo.