Novas borrascas desde o xoves porán a case toda Galicia en alerta por choivas e vento

Galicia afronta desde este xoves varias xornadas de tempo inestable e mar moi alterado, con novas borrascas atlánticas que chegarán tras o paso de Kristin pola Península. Afortunadamente, esta depresión deixou á comunidade na marxe dos seus efectos máis severos, a pesar de que no Sur de Ourense hai problemas nalgunhas zonas para circular debido á neve. 

Os modelos de Meteogalicia e AEMET para os próximos coinciden nun escenario de chuvascos frecuentes, vento intenso do suroeste e avisos importantes na costa.

Xoves: máis chuvascos e primeiro reforzo do vento

Para a xornada do xoves, Galicia quedará nunha posición intermedia de presións entre as altas e as baixas, con ventos de compoñente marítima que arrastrarán nebulosidade e precipitación sobre todo á metade oeste e ás zonas de montaña. Ao longo do día espéranse intervalos de nubes con chuvascos intermitentes, que pola tarde se estenderán a toda a comunidade e poderán ser de neve nos cumes máis elevados, con temperaturas en lixeiro a moderado ascenso.

​

Segundo a previsión de AEMET, o ceo estará nubrado ou cuberto, con algunhas aperturas de claros xa pola tarde e néboas matinais dispersas no interior. As choivas serán, en xeral, débiles ou moderadas, máis persistentes nas áreas de montaña e con posibilidade de tormentas na metade norte nas horas centrais do día, mentres a cota de neve descenderá até situar ao redor dos 1.500 metros ao final da xornada ​ 

AEMET mantén para o xoves avisos de perigo importante na costa por mar combinada do oeste ou noroeste, con ondas de entre 5 e 7 metros na Mariña (Lugo), o litoral da Coruña e as Rías Baixas, con probabilidade entre o 40% e o 70% durante gran parte do día. Ademais, espéranse refachos de vento de até 80 quilómetros por hora no noroeste, oeste e suroeste da Coruña e na Mariña, e de 70 quilómetros por hora no interior da Coruña, Lugo e Pontevedra, con vento predominante do oeste.

Nas cidades, a previsión de AEMET apunta para o xoves a temperaturas en ascenso, con valores aproximados de 11 a 15 graos na Coruña e Pontevedra, de 9 a 14 en Ourense e de 6 a 12 en Lugo.  

Meteogalicia, pola súa banda, decretou alerta amarela en todo o país debido ao vento. 

Venres: nova borrasca e mar moi adverso

O venres, unha nova borrasca atlántica situarase ao suroeste de Irlanda, cunha fronte activa asociada que afectará de cheo a Galicia e reforzará a inestabilidade. Meteogalicia prevé ceos parcialmente cubertos con choivas localmente tormentosas, máis intensas na metade oeste, e unha cota de neve que irá baixando progresivamente até os 800–900 metros ao final do día.

A predición de AEMET para o venres fala dun día moi chuvioso, con ceo nubrado ou cuberto, néboas dispersas en zonas altas do interior e precipitacións que poden ser localmente fortes e persistentes en áreas montañosas do interior. As temperaturas tenderán a descender, con mínimas que se esperan ao final da xornada e xeadas débiles nas montañas do sueste, mentres o vento do suroeste soprará bambo ou moderado, pero con intervalos fortes e refachos moi fortes no litoral e zonas altas. 

Para o venres 30, os servizos meteorolóxicos advirten dunha situación marítima moi complicada, con refachos de vento por encima de 70–80 quilómetros por hora e ondada significativa. Todos os tramos costeiros galegos —noroeste, oeste e suroeste da Coruña, A Mariña en Lugo, Rías Baixas e Miño en Pontevedra— atópanse baixo aviso de perigo importante por mar combinada do oeste ou noroeste de 6 a 8 metros, con vento do suroeste de forza 7–8, rolando a noroeste ao final do día.

Ademais, o venres avisos por choivas intensas no sur de Ourense e o interior de Pontevedra, onde se prevén acumulados de 15 milímetros nunha hora e 40 milímetros en 12 horas, con probabilidade entre o 40% e o 70%. En terra, AEMET mantén tamén avisos por vento con refachos de até 80 quilómetros por hora na montaña de Lugo, o noroeste e oeste da Coruña, e diferentes áreas de Ourense e Lugo, así como refachos de 70 quilómetros por hora en comarcas do interior.

​

Sábado: continuidade do réxime de borrascas

De face ao sábado, Galicia seguirá baixo a influencia das borrascas atlánticas, cun réxime de ventos do suroeste que arrastrará unha nova fronte ao final do día. Meteogalicia anticipa ceos en xeral nubrados, con choivas que comezarán pola tarde no litoral da Coruña e iranse estendendo ao resto da comunidade durante a noite, acompañadas de vento moderado do suroeste con intervalos fortes na costa.

As temperaturas o sábado non sufrirán cambios significativos, mantendo o ambiente húmido e invernal típico de finais de xaneiro en Galicia. Este novo episodio súmase a unha serie de temporais que, nos últimos días, deixaron fortes ondadas, cortes de estradas e avisos de distinto nivel no noroeste peninsular, situando a Galicia como unha das zonas que máis está a notar o paso encadeado de frontes atlánticas.