O máis duro da borrasca Joseph empeza pola tarde e seguirá até a madrugada do martes

A borrasca Joseph mantén en albas a Galicia con choivas torrenciais, ventos de máis de 110 km/h e alerta vermella activa no interior de Pontevedra até a madrugada do martes.  As alertas de AEMET empezaron ás 17 horas e o peor espérase que termine ao redor das dúas da madrugada da noite do luns ao martes, aínda que despois seguirá habendo temporal, que non se acougará do todo até a mañá do martes. 

A Xunta mantén o plan Inungal en fase de preemergencia ante o aumento do caudal de varios ríos e pide precaución máxima á cidadanía.  Espéranse inundacións na conca do Lérez, Verdugo, Ulla e outros ríos das Rías Baixas. 

A comunidade galega vive este luns unha nova xornada marcada pola intensidade das precipitacións e os refachos de vento asociadas á borrasca Joseph, que puxo en alerta vermella ao interior da provincia de Pontevedra, onde se esperan acumulacións superiores aos 150 litros por metro cadrado. No resto do territorio, AEMET mantén avisos laranxas e amarelos por choivas, vento e temporal marítimo. 

Durante a madrugada do martes, as choivas máis intensas concentraranse no interior de Pontevedra e os seus límites con Ourense, sen descartar episodios localmente fortes. Nas canles do Lérez, Verdugo e Ulla, a Confederación Hidrográfica Miño-Sil segue vixiando por risco de desbordamento, mentres a Xunta mantén activado o plan Inungal en fase de preemergencia para facer fronte a posibles inundacións.

Meteogalicia acaba de advertir que a borrasca Joseph pode deixar ventos de máis de 100 quilómetros por hora en moitas zonas do litroal e de montaña. Nas provincias da Coruña e Pontevedra serán frecuente os refachos de 90 quilómetros hora. 

Pontevedra, o epicentro do temporal

O interior pontevedrés é a zona máis afectada por Joseph. Dezaseis municipios recibiron mensaxes de alerta ES-Alert ante o risco extremo de choivas. En Cuntis , o desbordamento do regueiro de Calvos obrigou a varios veciños a retirar mobles e aveños das plantas baixas por precaución. 

O presidente da Xunta, Alfonso Rueda, sinalou tras a reunión do Consello que se mantén a alerta máxima na provincia e pediu evitar desprazamentos innecesarios. “Os servizos de emerxencias mantéñense alerta para intervir en calquera momento”, indicou o xefe do Executivo autonómico.

O alcalde de Vilaboa xa pediu á Xunta a suspensión das clases durante o martes e o nivel 2 de emerxencia.

Emerxencias desbordadas e 70 incidencias

Desde a medianoite do domingo até o mediodía do luns, o 112 Galicia contabilizou preto de 70 incidencias vinculadas ao temporal. A maioría, por acumulacións de auga na rede viaria e pequenos accidentes de tráfico, especialmente nas provincias da Coruña e Pontevedra. Afortunadamente, non se rexistraron danos persoais graves.

Na provincia da Coruña notificáronse 33 incidencias, fronte ás 21 de Pontevedra, 8 en Lugo e 7 en Ourense. As tipoloxías máis comúns foron caídas de árbores e ramas, obxectos desprazados polo vento e anegamientos localizados.

Os efectivos de emerxencia tiveron que intervir en varios accidentes derivados da meteorología. En Vedra , un camión envorcou na AP-53 e o seu condutor tivo que ser excarcerado, mentres na Pastoriza (Lugo), os bombeiros de Vilalba axudaron a rescatar a unha condutora tras chocar contra un muro. Na Coruña, unha colisión múltiple na AC-11 deixou unha persoa ferida, e en Oleiros , outro vehículo caeu a un regacho, aínda que os seus dous ocupantes foron rescatados sen lesións de gravidade.

En Ourense, a Deputación provincial tamén se atopa en situación de vixilancia pola acumulación de precipitacións, especialmente na zona da Baixa Limia. O seu presidente, Luís Menor, destacou a “plena coordinación coa Subdelegación do Goberno” no seguimento da evolución dos caudais e lembrou que se mantén operativo o dispositivo utilizado hai apenas semanas durante a borrasca Ingrid.

Acumulacións marca e fortes refachos de vento

Os datos de Meteogalicia reflicten un episodio de choivas intenso en varios puntos do país. En Rianxo (A Coruña), a estación de Ou Fieitoso rexistrou 107 litros por metro cadrado, seguida de Fornelos de Montes (Pontevedra) con 96,3 litros, Lousame (A Coruña) con 95,6 e Forcarei (Pontevedra) con máis de 92. Tamén se alcanzaron 86 litros en Mondariz , segundo as últimas medicións.

En canto ao vento, o refacho máis forte rexistrouse en Punta Candieira, en Cedeira (A Coruña), con 123,8 km/h, seguida de Oia (Pontevedra) e Vimianzo (A Coruña), onde o anemómetro superou os 110 km/h. O litoral atlántico mantense ademais baixo alerta laranxa por temporal marítimo, con ondas que poden chegar até os sete metros e ventos que alcanzarán forza 9.

O litoral oeste da Coruña e Pontevedra seguirá sometido a condicións adversas polo menos até o mediodía do martes, aínda que AEMET prevé que o vento amaine progresivamente a partir desa hora, dando paso a unha melloría paulatina.

Martes de transición e mércores máis tranquilo

Segundo a previsión de AEMET para o martes 27, Galicia amencerá con ceos cubertos e precipitacións persistentes, máis intensas ao comezo do día e tendendo a remitir pola tarde. A cota de neve baixará dos 2000 aos 600-900 metros, con xeadas débiles en zonas altas. As temperaturas mínimas caerán, especialmente no interior pontevedrés, mentres as máximas apenas variarán.

O vento seguirá soprando con forza do oeste no litoral e moderado a forte no interior durante a mañá, para ir diminuíndo a súa intensidade a medida que avance a xornada.

O mércores 28 espérase o fin das alertas en terra, aínda que persistirá o aviso laranxa por ondada nas costas. AEMET prognostica precipitacións débiles e vento moderado do suroeste, con ondas que de forma puntual poderán alcanzar os sete metros de altura e refachos de até 88 km/h mar dentro. A situación tenderá a estabilizar de face ao xoves, cando se espera o regreso do anticiclón ao noroeste peninsular.