A Xustiza condena a Hoist Finance por vulnerar a honra dunha muller á que inscribiu en ASNEF
ASNEF, "Asociación Nacional de Establecementos Financeiros de Crédito," é unha organización española que agrupa a diversas entidades financeiras e de crédito. A súa función principal é xestionar unha base de datos na que se rexistran a falta de pagamentos de particulares e empresas. Esta base de datos é coñecida como "ficheiro de morosos" e é utilizada por bancos, entidades de crédito, compañías de telecomunicacións, aseguradoras, e outras empresas para avaliar o risco de conceder un crédito ou de ofrecer un servizo a unha persoa ou empresa. Neste caso, os xuíces consideran que a débeda -recorrida nun preito- era "incerta".
A Audiencia Provincial da Coruña condenou a unha sociedade adquirente dun crédito impagado -- Hoist Finance Spain -- a indemnizar con 3.000 euros a unha muller polos danos e prexuízos que lle causou ao comunicar e manter os seus datos nun ficheiro de morosos.
Segundo informa o Tribunal Superior de Xustiza de Galicia (#TSXG), faio ao considerar probado que a empresa vulnerou o dereito fundamental á honra da demandante. Tamén a condenou a instar a baixa inmediata dos datos persoais dos afectada comunicados á Asociación Nacional de Establecementos Financeiros de Crédito (ASNEF).
Desta forma, acolleu o recurso interposto contra a sentenza que desestimou a demanda interposta contra a entidade financeira, ditada polo Xulgado de Primeira Instancia número 3 de Ferrol.
A sección cuarta da Audiencia Provincial conclúe no fallo que non pode considerar que a comunicación dos datos ao ficheiro de morosos realizouse por parte do acredor "concorrendo o requisito da existencia dunha débeda certa líquida e exixible, senón claramente contraditoria coa certificación de débeda na que se apoiou o requirimento de pago".
O recoñecemento de débeda asinado pola demandante, segundo a resolución, está invalidado porque carecía "da previa e suficiente información dos conceptos reclamados", o que demostra "que a débeda incorporada ao ficheiro automatizado era unha débeda incerta ao tempo da súa inclusión imprudente no ficheiro, e que é unha débeda controvertida até o punto de existir un procedemento xudicial no que se reclama con oposición da actora".
Os maxistrados explican que comprobaron a "imposibilidade de lectura" do contrato do cartón de crédito subscrito pola demandante, "non só respecto de que resulta ilexible a advertencia de que poderían incorporar os seus datos en caso de incumprimento das súas obrigacións nun ficheiro de morosos, advertencia que foi convenientemente emendada no requirimento de pago efectuado pola cesionaria do crédito, Hoist Finance Spain, á debedora".
"Senón e, especialmente, pola falta de incorporación ao contrato do condicionado xeral, circunstancia que impide a aplicación das cláusulas que naquel puidesen haber previsto".
Desta forma, segundo sinala a Audiencia, "a débeda devén incerta, pese ao recoñecemento da debedora, a quen se lle segue ocultando o contido do contrato ao tempo de asinar a súa conformidade coa débeda, en canto a calquera obrigación distinta da mera devolución das cantidades dispostas co cartón ou calquera suma retirada en caixeiros".
Escribe o teu comentario