Un operario falece ao caerlle encima unha árbore que estaba a cortar en Outes

Un operario, I.N. de 31 anos de idade, faleceu na mañá deste xoves en Outes  tras caerlle encima a árbore que tallaba.

Segundo informa o Consorcio Provincial contra Incendios e Salvamento da Coruña e o 112 Galicia, os feitos ocorreron sobre as 10.35 horas nunha zona de monte de Vilardigo, na parroquia de Cando.

Foi precisamente o Centro Integrado de Atención ás Emerxencias o que alertou aos bombeiros de Boiro, que se desprazaron ao momento.

En concreto, unha persoa quedara atrapada baixo unha árbore mentres estaba ao cortar. A pesar de todo, o médico de garda que se desprazou á zona só puido certificar a morte do home.

Tamén acudiron ao momento a Policía Local de Outes, o GES de Noia, a Policía Xudicial, a Garda Civil e unha ambulancia de soporte vital básico medicalizada con profesionais de atención primaria de Urxencias Sanitarias de Galicia-061.