A empresa xestora da Mina de Touro interpón un recurso no TSXG para seguir adiante co proxecto denegado

A empresa Cobre San Rafael, xestora do proxecto da Mina de Touro, interpuxo un recurso ao Tribunal Superior de Xustiza de Galicia, despois de ser desestimado o primeiro recurso contencioso-administrativo que interpuxeran.

Así o afirmou a Plataforma Veciñal Mina de Touro, que aseguran que a empresa defende un proxecto "cualificado de inviable" e que ademais conta cunha DIA (Declaración de Impacto Ambiental) negativa que, aseguran "non é recurrible".

A empresa, afirmaron o colectivo de veciños, "opta por ir aos tribunais galegos, en contra dos veciños, veciñas, asociacións e a Xunta de Galicia, defendendo un proxecto cualificado de inviable pola propia administración, o que demostra, unha vez máis, que está a facer pura propaganda do festexo".

"GREENWASHING"

A Plataforma de Veciños da Mina de Touro considera o márketing e a publicidade que viran ao redor do proxecto de Cobre San Rafael un "greenwashing", ao que tachan tamén de "lavado de mala imaxe". "Dedican e empregan contías inxentes en comprar todo o que se queira vender, con tal de facer unha foto, un vídeo e un sorriso que lles faga quedar como o que non son".

Os veciños do muncipio de O Pino afirman que levan anos escoitando os mesmo mensaxes, nos que se promete unha minería moderna, sostible, con transparencia e boa fé e na que se atenderá á calidade das augas. Son os mesmo anos que levan os veciños manifestándose para dicir "non" á Mina de Touro.