O Corte Inglés e os Bancos de Alimentos galegos unen forzas na campaña solidaria máis grande do ano

A 'Recolleita Primavera', a iniciativa solidaria impulsada pola Federación Española de Bancos de Alimentos (FESBAL) e os seus asociados, ten desde este 1 de xuño unha aliado clave nos centros de Supermercado O Corte Inglés, Hipercor, Supercor e Sánchez Romero. Aínda que o arranque oficial non se produce até o xoves 5, a cadea adiantou a participación para maximizar a recadación. Os clientes poden colaborar tanto de forma presencial como a través das súas compras na app e as páxinas web do grupo.

A fórmula é sinxela: antes de finalizar o pago, o comprador elixe unha achega económica entre os importes predefinidos de 1, 3, 5, 10, 25 ou 50 euros. Quen acudan fisicamente a tenda teñen ademais a opción de contribuír coa cantidade que consideren oportuna. Ao peche da campaña, O Corte Inglés engadirá un 10% adicional sobre o total recadado, destinado a sufragar os produtos que cada Banco de Alimentos autonómico identifique como máis urxentes.

Os catro bancos galegos, no centro da iniciativa

En Galicia, a recadación chegará aos catro bancos provinciais integrados na Federación Galega de Bancos de Alimentos (FEGABAN) e en FESBAL: o Banco de Alimentos da Coruña (Balrial), o Banco de Alimentos de Lugo, o Banco de Alimentos de Ourense e o Banco de Alimentos de Vigo, que estende a súa cobertura ao conxunto da provincia de Pontevedra. 

Estas entidades actúan como ponte loxística entre os excedentes alimentarios e as organizacións sociais —comedores, centros de menores, ONGs— que atenden directamente ás familias en risco de exclusión.

A alianza entre O Corte Inglés e FESBAL supera xa a década de colaboración continuada e abarca os 53 bancos asociados a nivel estatal. A modalidade de doazón monetaria, fronte á entrega de produtos físicos, permite ademais reducir custos loxísticos e adaptar as compras ás necesidades reais de cada territorio en cada momento.