Un xaneiro moi chuvioso pero dentro da normalidade, din os científicos

Expertos de Meteogalicia e a Universidade de Santiago de Compostela coinciden en que as intensas choivas de xaneiro non son unha marca histórica nin un fenómeno excepcional. O mes caracterizouse pola chegada constante de frontes atlánticas, pero se mantén dentro da variabilidade natural do clima galego.

A meteoróloga de Meteogalicia, María Jesús Soto, explica que a situación responde, en boa parte, á posición do anticiclón dos Azores, desprazado cara ao sur. En condicións habituais, este sistema actúa como unha “barreira natural” que desvía as borrascas cara ao norte, pero a súa localización actual ha permitido a entrada continua de frontes. “Non é algo novo; Galicia sempre foi o comité de benvida das borrascas”, recalca a experta.

Durante xaneiro, as choivas foron persistentes e repartidas ao longo do mes. A diferenza respecto doutros invernos non está na cantidade total de auga, senón na súa distribución temporal. En moitos puntos choveu case a diario, o que xerou a sensación dun inverno excepcional aínda que os rexistros non o confirmen.

Santiago recolleu menos auga que en 2025

O profesor de Física Atmosférica da #USC, Gonzalo Míguez Macho, coincide en que os datos ofrecen unha lectura moderada. En Santiago de Compostela medíronse 382,8 litros por metro cadrado, por baixo dos 514 que se alcanzaron en xaneiro de 2025. O académico sinala que Galicia atravesa un período dominado por borrascas, pero lembra que este patrón é habitual no inverno. “O Atlántico está especialmente activo, pero non é anómalo”, resume.

Segundo Míguez Macho, a poboación tende a esquecer outros episodios de choivas persistentes, como os de 2014, cando varias ciclogénesis golpearon a rexión. Ao seu xuízo, o constante desfile de borrascas con nome propio —Goretti, Kristin ou Leonardo— reforzou a impresión dun inverno interminable. Aínda así, insiste en que estas situacións son cíclicas e repítense con frecuencia en Galicia.

Sen cambios a curto prazo no tempo

Meteogalicia anticipa que non haberá un cambio importante no patrón meteorolóxico das próximas semanas. Espéranse alternancias de novas frontes atlánticas con xornadas algo máis estables, sempre baixo un contexto de humidade elevada e refachos de vento.

O último informe climatolóxico do organismo confirma que xaneiro de 2026 foi o oitavo máis húmido desde que existen rexistros. A precipitación media situouse en 290 litros por metro cadrado, segundo a serie histórica 1961-2026. As maiores acumulacións, entre 550 e 700 litros, concentráronse no oeste e suroeste da Coruña e nas serras litorais; mentres, o leste de Ourense pechou o mes con valores inferiores a 100 litros por metro cadrado.