Probable temporal de neve este fin de semana en Galicia

A chegada dunha fronte atlántica o venres coincidirá cun descenso extremo das temperaturas, especialmente no interior de Lugo e Ourense, onde poderían ver as primeiras nevadas moi importantes do inverno. A combinación de aire frío en altura, baixas presións e vento do noroeste traerá choivas persistentes, mar axitado e un ambiente puramente invernal en toda Galicia.

Galicia, baixo o “tren de borrascas” atlántico

Os modelos meteorolóxicos apuntan a que, entre o martes 21 e o domingo 25 de xaneiro, unha sucesión de borrascas cruzará a Península Ibérica, afectando de cheo ao noroeste. Este “tren de borrascas” traducirase en precipitacións diarias e acumulacións notables de auga na fachada atlántica galega e zonas montañosas. Nas Rías Baixas e A Costa da Morte, o vento soprará con forza, con refachos que poderían superar os 80 km/h, mentres o mar presentará ondada moi significativa durante o fin de semana. De feito, hoxe boa parte do país está sometido a alerta amarela por acumulación de choiva.

A orixe desta situación está na gran acumulación de neve en Europa e Asia, que desprazou as masas de aire polar cara ao sur, empuxando as borrascas até latitudes máis baixas. España, e en especial Galicia, serán este fin de semana as principais receptoras do aire frío e a humidade atlántica.

Os días do fin deas emana, 24 e 25 ,de xaneiro poderían rexistrar os momentos de maior intensidade do temporal. O modelo estadounidense GFS prevé a entrada dunha masa moi fría en altura sobre o noroeste peninsular, o que podería provocar chuvascos tormentosos, saraiba e neve en cotas inesperadamente baixas. En caso de cumprir as previsións, a cota de neve baixaría até os 600 ou 800 metros, con risco de nevada en zonas rurais de media montaña da costa atlántica, non só nas grandes cadeas montañosas interior.

A Axencia Estatal de Meteorología (AEMET) prevé para o venres e sábado temperaturas máximas de apenas 4–5 °C nas capitais de provincia do interior e mínimas próximas a 0 °C, mentres na costa manteranse entre 7 e 9 °C. As choivas intermitentes e o ceo cuberto serán practicamente constantes, con posibles intervalos de neve húmida nos vales máis fríos de Lugo e Ourense.

Choiva, frío e neve: un fin de semana tipicamente invernal

O xoves 22 marcará o inicio do cambio de tempo, con ceos nubrados e choivas débiles que se intensificarán co paso das horas. A medida que avance o venres, as masas frías aumentarán a súa presenza e a choiva volverase máis intensa, acompañada de vento forte. O sábado espérase o punto culminante do temporal, con máximas que dificilmente superarán os 5 °C e posibilidade de nevadas en cotas medias.

Para o domingo 25, os modelos indican un lixeiro ascenso térmico, aínda que o ambiente seguirá xélido, con máximas de 7 °C e mínimas ao redor de 4 °C. En calquera caso, o carácter húmido e ventoso persistirá. A AEMET mantén a incerteza sobre a evolución exacta da cota de neve, pero os escenarios máis probables apuntan a acumulacións moderadas en zonas de montaña.