Terceiro día de folga dos técnicos superiores sanitarios, con miles de probas no arame

O seguimento da folga de técnicos sanitarios rolda o 57% na quenda de mañá deste luns en Galicia, tal e como informou a Consellería de Sanidade. O apoio é máis elevado en base aos datos dos convocantes, a Asociación Española de Técnicos de Laboratorio (AETEL), que o cifra en valores similares aos da pasada semana, é dicir, ao redor dun 90%.
 

Máis pormenorizadamente, e segundo os datos autonómicos, a porcentaxe de participación nas sete áreas sanitarias do Sergas alcanzou o 57,27%. Pola súa banda, en entidades sanitarias como son a Axencia Galega de Doazón de Sangue, Órganos e Tecidos (ADOS), a empresa pública de servizos sanitarios Galaria e a Fundación Pública Galega de Medicamento Xenómica, a porcentaxe de seguimento foi do 56,67%.
 

Destacan ademais que o grao de cumprimento dos servizos mínimos foi do 100%.

Esta é a terceira xornada dun paro que comezou o pasado xoves, 30 de outubro, e que terminará este martes, 4 de novembro.
 

PROTESTA EN MADRID

Este luns celebrouse en Madrid a manifestación central, que partiu do Ministerio de Facenda, continuando polo de Educación, e que finaliza fronte ao Ministerio de Sanidade.

Lamentan que este departamento estatal "continúe en silencio" e instan a que "abandone a súa actitude negacionista, deixando o terraplanismo político". Así mesmo, animan a que fagan fronte á "realidade": "a situación dos técnicos en España é única en Europa e require solucións urxentes e valentes".

Xa en Galicia organizáronse -- tanto para este luns como para o martes -- concentracións nas principais cidades, ás 12.00 horas, fronte a hospitais e sedes de subdelegacións do Goberno.